2188/2022-2023

Aizawl 5th October 2022: Vawiin khan Trade, Commerce & Industries Minister Dr. R.Lalthangliana chuan Evolution Fest- Local Products Expo, Millennium Roof Top-ah a hawng. Local Products Expo hi Department of Mizo, Mizoram University leh Union Ministry of Culture tangkawpin Azadi Ka Amrit Mahosav, India@75 lawmna kal zel denchhena an buatsaih a ni a. Minister hi Dr. Zoramdinthara, Associate Professor, Department of Mizo, MZU in a lo dawngsawng a ni. 

Khuallian chuan he hun hmang tura kalkhawmte chu tum  mumal tak nei, nih tum sang nei, mahni kut kea dinchhuah tum te an ni a ti a. Minister chuan Mizorama thil thar chhuah leh siam chhuah na hmun stall 20 vel bawrah thil chu hrang hrang - painting, thil lem siam, hnang leh Bamboo fibres atanga kawr siamchhuah, food processing products, handloom leh thil dangte hmuh theih leh phochhuah theiha a awm chu ropui a tih thu sawiin, vawiin programe hian thil thar a hring chhuak dawn a ni a ti a. Minister chuan hlawhtlinna chang turin taima leh rinawm taka bei fat fat turin entrepreneur te a chah bakah sawrkar hnain mi zawng zawng a daih meuh loh avangin  thiamna bik nei ten eizawnna an dap chhuah zel a ngai a ni a ti a. Chung atan chuan sawrkar department hrang hrang ten heng mahni kut kea eizawnga thiamna nei te phochhuahna platform hi kan ngaihtuah a, hma kan lak zel a tul a ni a ti a. Skill/ thiamna tak tak neite  tan hna zawn kawngah harsatna a awm lo a, hna in a zawng zawk a ni tih hre reng turin thalai te a chah a, eizawnna kan siam chhuah zel hi mimal, chhungkua in tundin nan a pawimawh em em a ni tiin a sawi.

Khuallian Dr. R.Lalthangliana chuan vawiina rawn inphochhuakte bul tan kum thlirin, kum 2018 vel atanga bul tan, covid in kum hnih chuang chiahte an ni ve a, amaherawhchu tumruhna nen he expo-a an rawn inphochhuak erawh ngaihsan awm a ti a. Heng an thilsiam thenkhat lemziah, handloom leh eitur, ram pawn leh state danga hralhchhuah a ni tih a hriatin a chhuang em em a ni tih a sawi.

Local Expo hi Ace Events ten buaipuiin, stall 20 a awm a. Stall ah te hian Art Novelty, Tawlhloh, Tlaizawng, Lelen, Sunhlu Products, Local leh a dangte an inpho chhuak a, nikhat awh tur a ni.

Attachment

  • Loading attachment...