2189/2022-2023

Kolasib dated 5th October 2022: Vawiin khan District Urban Development Office, Kolasib hmalakna hnuai a Faina Hapta 2022 hmanna pualin Kawnpui Town Sanitation Committee-te nen bawlhhlawh sawngbawlna hmun, Solid Waste Management Centre, Dihmuntlang tlawhna hun hman a ni a. Pu John LT Sanga, Deputy Commissioner, Kolasibin he hun hi telpuiin Pi Rebecca Laldinmawii Hrahsel, SDO (C), Kawnpui leh Pu Hmingthanzuala, DIPRO, Kolasib te an tel bawk a ni.

Pu John LT Sanga, Deputy Commissioner chuan faina chu hmasawnna leh changkanna tehfung pawimawh tak a nih thu leh faina chuan thianghlimna leh hriselna a ken tel tlat avangin mi tin hian fai kan ngaih pawimawh thar a tul thu a sawi a. Faina Hapta 2022 hmanna kal zel ah vawiin hian Kolasib khaw chhung hmun hrang hrangah veng chhung tihfai hnatlang an neih thu sawiin Faina hapta hman zawh hnu thleng pawh a fai tur a hmalak zel a pawimawh thu a sawi.

Pu C.Lalmuan Puia, District Urban Development Officer, Kolasib chuan Solid Waste Management Centre-a bawlhhlawh sawngbawlna kalpui dan tlangpui tarlangin in tin atanga bawlhhlawh thliar hran that loh avangin a sawngbawlna hna kalpuina ah harsatna a awm phah thin thu a sawi a. Solid Waste Manangement Centre chu thil thar a nih angin a tihchangtlun zelna turin tuna a kal dana a tha lai leh tha lo lai te zirchian a nih thu leh thuneitu sang zawk a thlen thin a nih thu a sawi bawk a ni.

Faina hapta 2022 pual hian Sawrkar leh khawtlng tangrualin Kolasib hmun hrang hrangah Faina hnatlangpuite kalpui a ni a, School, Office, Hospital leh bazar hmun tifaiin hun hman a ni. Faina Hapta kharna hun hi ni 8 October ah hman a ni ang.