Chief Minister Pu Lal Thanhawla chu Zotlang leh a chhehvel khua te tana hmasawnna tam tak a thawhte chu chhuanawm tiin Zotlang khawtlang hruaitu Village Council-in vawiin khan Dam Dama Memorial Hall, Zotlangah an chawimawi.

Chief Ministeer chuan chawimawi tlak nia a inhriat loh thu sawiin, chawimawi tlak leh tlak lohte kan hriat a pawimawh hle a ni a ti a. Hetianga amah chawimawina an nei chu Zotlang khawtlang chungah lawmthu a sawi a. Helai bial hi Mizoram Legislative Assembly-a a mit tikeutu an ni tiin, tuna a sorkar hian Mizo te hi hnam zahawm leh hnam ropuia siam hi a tum ber a ni a ti a. Hemi tur hian ei leh barah leh sum leh paiah kan intodelh hmasak a tul a ni a ti a. Chuvangin a mihring tam ber zawk kuthnathawktu, loneimi, mi harsa, pachhia leh chanhai ten an khawbuzawlah theuh lei rem an raha khaw eng an hmuh a, an dinhmun chawikan hmasak a tul a ni tih hriaiin NLUP chu kalpui mek a ni a ti a. Hei hi sorkar ang chuan a tipuitling mek a, a hlawhtlinna tak tak erawhchu a dawngtute kutah a awm a ni a ti. Chuvangin dikna, rinawmna leh taimakna nen Pathian tih chunga an kalpui a ngai a ni a ti a. Chutianga thawkte chu hlawhtlinna an hmu chho mek a ni a ti.

Chief Minister chuan Pathian malsawmna tawngbaw zawnga hnathawkin, midangte tana malsawmna nih kan tum a tul a ni a ti a. Malsawmna kan tawng buakte chu Pathian hnena lawmthu kan sawi nan kan kohhran thawhlawm te lo pungin chu chuan thlaraubote zawngchhuak turin kohhrante an luang chhuak thei dawn a ni a ti a, hei hian malsawmna atangin malsawmna tam leh zual kan tawngbaw thei dawn a ni a ti. Hmasawnna hnathawhna kawngah sorkar hmalakna chauh a tawklo a, mipui ten mawhphurhna thui tak kan nei ve a ni tih kan hriat a tha tiin, kawngtinrengah tan kan lak angai a ni a ti.

Chief Minister hian hmasawnna chi hrang hrang kawngpui siamte, rel kawng siam chungchangah te, inbiakpawhna lamte, power siamchhuah thuah te,hriselna tha mipui ten kan neih theihna tura hmalakte leh a dang thahnemtak, thalaite tana kawng hrang hranga hmalaknate a sawilang bawk a ni.

Zotlang khawtlang hruaitute hian Chief Minister hi thuziak citation an hlan a, Pi Lal Riliani, President, Indian Society on Tobacco & Health, Mizoram Chapter hnenah Zotlang MHIP ten emping an hlan bawk a ni.

Chawimawina inkhawm hi Pu C. Laldenga, VCP, Zotlangin a kaihruai a ni.

Chief Minister hi Pu Lalrinmawia Ralte, Minister of State, Pu T.T. Zothansanga, Parliamentary Secretary leh Pu R.Vanlalvena, MLA & Chairman, zohanco ten an tawiawm a ni.