Social Welfare Minister Pu P.C. Lalthanliana chuan “Dan leh thupek khauh tak hian zu a ti rem thei lo tih hi Mizoram leh khawvel pawhin a hria in ka ring “ a ti. Mizoram Social Defence & Rehabilitation Board leh Indian Alcohol Policy Alliance (IAPA) tangkawp buatsaih zu that lohzia hrilhhriatna leh a tihren kawnga chak taka chet lak dan tur Regional Workshop ni 2 awh tur chu vawiin khan I&PR Auditorium ah hawngin he thu hi a sawi a ni.

Workshop hawnna inkhawm hi MSD&RB Chief Executive Officer Pu K. Darthanga’n a kaihruai a. Social Welfare Minister Pu P.C. Lalthanliana chuan Total Prohibition kenkawhna state Mizoram ah zu do dan tur chungchang a workshop neih a ngai chu thil inhmeh lo tak niin lang mahse zu hian mimal chhungkua khawtlang leh ram tan chhiatna nasa tak a thlen thin avangin zu that lohzia inzirtir leh a tihren kawnga chet lak dan tur chak tak duan chu thil tul tak a ni a ti a. Tlawmngai pawl hrang hrang te mahni tha leh zung, hun leh sum senga zu do kawnga pen chhuak te chu fakawm a tih thu sawiin midangte nun chhanna leh dam khawchhuahna hial tur thlira an hun pum a tha an thawh ah lawmthu a hrilh a. MSD&RB Chairman ni bawk Pu P.C. Lalthanliana chuan he workshop rawn huaihawttu IAPA chungah lawmthu a sawi a. Workshop chhim tura lo tel sorkar department hrang hrang aiawh leh mipui mimir ten sorkar policy ang ang pawm tlan chu khua leh tui dik tak te tihtur a ni a ti.

Workshop hawnna ah hian Mr. Johnson J. Edayaranmula, Executive Director, IAPA chuan thu hma sawiin khawvelah mihring te tana thil hnawksak zu, damdawi ruihtheih leh zuk leh hmuam titlem turin UNO chuan hma a la a, India ramah chuan Ministry of Social Justice and Employment hnuaiah IAPA in chak takin hma a la a ni a ti a. Khawvel pum hi Region 6 American, Europen, Mediterranean, Asia Pacific, Afgo Region leh South East Asia Region ah thenin chung zinga India tel ve na South East Asia Region leh Afgo ah te chuan zu do hi theihtawp chhuah a tan lak tul zualna hmun a ni a ti a. Ram chhung hmun 5 (nga) ah hetiang Regional Workshop hi neih tura rel a nih angin Aizawl ah pawh ni hnih (2) chhung hian buatsaih a nih thu a sawi a ni.

Workshop neih chhung hian Zu in mihring hriselna a tihchhiat dan te, Sum leh pai a nghawng dan te, Zu khap dan leh hrai hrang hrang te chet lak dan tur leh invenna te bakah khuahkhirh dan tur hrang hrang te chipchiar taka zir ho a ni ang a zawhna leh chhanna te nen sawiho nan hun hlawk thlak tak neih tura ruahman a ni.

Regional Workshop chhim tur hian tlawmngai pawl hrang hrang, ruihhlo ngai leh ngawl vei enkawltute, MSACS, Police leh Excise department aiawhte an tel a ni.