Nimin (19.12.2018) khan Chief Minister Pu Zoramthanga chuan Chief Minister's Office Cabinet Meeting Room-ah NGO hrang hrang leh kohhran hruaitute a kawm. Deputy Chief Minister Pu Tawnluia leh Excise & Narcotics Minister Dr. K. Beichhua te meeting-ah hian a tel a ni.

Chief Minister chuan nimin Cabinet Meeting in zu hralh phalna titawp tura thutlukna a siam leh mimal agency ten an hralhchhuah loh nan dry day puan a nih thu a sawi a. Heng hmalakna te hi  hlawhtlin theih nan kohhran leh tlawmngai pawlte nen a thawhho leh mipui thlawpna a pawimawh thu a sawi a.  Zu leh ruihhlo vanga buaina tawkte enkawlna tur ngaihtuah thuai a nih tur thu a sawi bawk.

Meeting-ah hian NGO leh Kohhran hruaitu hrang hrangten sawrkar thutlukna chu tha an tih thu an sawi a. State state pawn atanga dan lova zu lo lut tur dan leh state chhunga dan lova zuar te khuahkhirhna kawnga hma la turin sub-committee din rawt a ni a. Excise & Narcotics Minister Dr. K Beichhua kaihhruaiin Liquor Prohibition Coordination Committee chu din nghal niin, Vice Chairman ah Principal Secretary, Home; Secretary ah Commissioner & Secretary, Excise & Narcotics; Assistant Secretary ah Commissioner of Excise and Narcotics Department te an ni. Member ah chuan IGP (Law & Order), DIG (Norther Range) leh CYMA OB zawng zawng an ni a. Naktuk dar 2:30 hian Excise Minister pisa ah hmalak dan tur ngaihtuah in an thukhawm nghal dawn a ni.

Meeting-ah hian Chief Secretary Pu Arvid Ray, Principal Secretary Home Pu Lalnunmawia Chuaungo, Excise Commissioner & Secretary Pu K.T. Beicho, Law & Judicial Secretary Pi Marli Vankung leh officer dangte an tel a, CYMA, MHIP, MUP leh MKHC hruaitu thahnem tak meeting-ah hian an tel a ni.