Vawiin chawhnu khan Food, Civil Supplies & Consumer Affairs Minister Pu K.Lalrinliana’n a Pisaah Food, Essential Commodities Assurance & Security Target (FEAST) Software a tlangzarha, he hun hi Pu HL Rochungnunga, IAS, Commissioner & Secretary, FCS&CA Department in kaihhruaiin district hrang hrang DCSO leh Legal Metrology Officers te an tel a, Pu H.Lalzirliana, MLA in a tawiawm bawk a ni.

Minister Pu K Lalrinliana chuan,” FEAST Software chu Sawrkar langtlang siam nana hmanraw tangkai tak anih ngei ka beisei,” a ti a,” Sawrkar atanga hamthatna siam tam takte chu a dawngtu tur dik tak te hnenah a thleng ngei a ni tih finfiahna hmangraw pawimawh tak a ni dawn a ni,” a ti bawk.

Pu HL Rochungnunga, IAS, Commissioner & Secretary, FCS&CA Department chuan, FEAST Software chu National Food Security Act tih famkimna atana hmalakna kal zel a ni thu leh Ration Card Digitalization kalpui a nih hnua hmasawnna awm te a tarlang a, Online allocation hmanga awlsam taka Ration buhfai dawn zat tur chhut a nih tawh thu te a sawi bawk.

Supply Chain Automation hi Mizoram pum a hman theih tur niin FEAST Software hmang hian FCI Kudam atanga Supply Centre thlenga buhfai phurh dan chhuizui na tur a ni a, FCS&CA leh NIC Mizoram hmalakna a buatsaih a ni.

Minister Pu Lalrinliana leh FCS&CA Department hotute hian thutkhawmna nei zuiin Thla khata Ration buhfai vawi khat sem ni thin chu vawi hnih tal sem anih theih dan tur an sawiho a, Public Distribution System (PDS) te kaltlanga Chini sem anih theih nana hmalak leh Khawnvartui sem zat tih pun dan tur uluk takin an ngaihtuah bawk.

He hunah hian Pu Lallawmkima, Scientist B, NIC in FEAST Software tangkaina leh hman dan tur tlangpui a tarlanga, Pi Shashanka Ala, IAS, Director, FCS&CA in lawmthu sawina hun a hmang bawk.