Tukin zing kar ah khan Vanapa Hall kawtah Zuk leh hmuam bansan pawl, Tobacco Quitter of Mizoram(TQM) chuan vaihlo leh a kaihhnawih laka inthiar fihlim duhte leh vaihlo ngawl vei mekte chhanchhuak tur an pawl din champha phak vawi khatna chu Health Minister Pu Lal Thanzara hovin an hmang a.
He huna thusawitu Health Minister Pu Lal Thanzara chuan meizial zuk a bansan dan leh amah ngei pawhin hriselna kawnga a hlawk chhoh pui dan te a sawi a. Meizial, sahdah leh vaihlo kaihhnawih zawng zawngte hi tih chhin loh hrim hrim a pawimawh a. Sim hial ngaia lo chin dawklak hnu chuan mimal hriselna ah nghawng tha lo tam tak a lo awm hman mai bakah channa tam tak alo awm tawh thin thu sawiin,tem chhin loh hrim hrim chu a hlawk ber zawk a ni a ti. Pathian In chu mihring taksa a ni tih kan pawm si chuan tih bawrhban a thiang lo a ni a ti a. Ruihhlo vanga Pathian In mawi tak tih bawrh ban anih chuan natna hmanga hremna tuar pawh a hlauhawm khawp ang a ti a ni. Cigrarette bawm a thil hmuh nuam lo tak sawrkarin a tarlan te hi intihthaihna satliah ni lova, vaihlo turin a thlen theih natna chungchang mipuite hnena a puan chhuahna leh mithiam ten an finfiah thlap a ni a ti. Tul lova sum sen ralna a nih piah lamah khawi hmun ah pawh puipunna apiang leh vantlang hmunah te meizu mi te an chep tawh thu sawiin Mizo mipuite pawhin zuk leh hmuam chungchangah hnam changkang zawkte kan entawn a hun tawh a ni a ti.
Thusawitu dang te - Dr. Jane R. Ralte, State Nodal Officer, MSTCS, Pi Lal Riliani, President, ISTH(M) leh zirlai aiawh in Vanlalrochhara, Leader, Anti-tobacco Club, Oasis HSS, Tuikual te chuan zuk leh hmuam ti mekte chu an thil chin hrisel lo tak te bansan tur leh vaihlo tur laka thianghlim mek te thianghlim chhunzawm turin an chah bawk ni. TQM Raising Day hi an pawl President Pu Saimawia’n kaihruaiin Pu R.Lalhmangaizuala, Secretary, TQM in vaihlo leh a kaihhnawih laka chhanchhuah ngaite chhanchhuak tura intiamna chham ho na hun a kaihruai thung.
