Nimin 17th July 2012 khan I&PR Conference Hall, Mamit ah Mizoram State Tobacco Control Society buatsaihin MJA, Mamit te tan workshop buatsaih a ni.
He Workshop hi Pu P.C Lalthanzuala President MJA Mamit in kaihruaiin Dr Jane R. Ralte State Nodal Officer cum Project Officer chuan a hmanpui a ni.
Dr Jane R. Ralte chuan media te hi a Awareness thehdarhtu tha berte zinga mi an nih avangin thahnem ngai taka zuk leh hmuam dona kawnga hmalakna te a zau thei ang bera theh darh sak turin a sawm a. Dr Jane R. Ralte chuan zuk leh hmuam dona kawnga hmalakna hrang hrangte leh District hrang hrang dinhmunte power point presentation hmangin a sawifiah a ni.
He workshop-ah hian Mamit District in kawng hrang hranga pakhatna dinhmun a hauhna te tarlan a ni a, chungte chu 1) Puipunna hmuna meizu ( Active Smoking) tlem ber (62.50% atangin 5.41%) ah a tla hniam a (as per compliance study conducted on may-June 2011), No smoking signage tarah pakhatna te, zuk leh hmuam hraltu ten an tar tur an tar tha ber a, hei bakah hian zirna in ten an tar turah sikul tinah an tar vek bawk a ni.
Pi Vanlalzari District Co-ordination Mizoram State Tobacco Control Society Mamit District chuan thusawiin zuk leh hmuam dona kawnga dan zawm tur hrang hrang zawmna kawngah District chhung mipuite an fakawm hle a ni tiin District chhung mipui zawng zawngte chungah lawmthu a sawi a ni.
He hunah hian zawhna leh chhanna hun te hman niin Zuk leh hmuam dona kawngah tan lak leh zualna tur te sawiho a ni bawk.
He workshop-ah hian Mamit khawpui chhunga thuthar thehdarhtute an tel tha hle a ni.
