Nimin chawhma dar 10:30 khan Champhai I&PR Conference Hall-ah Mizoram State Tobacco Control Society te buatsaihin ‘ Meet with the Press’ neih a ni.

He meeting Pi K. Laldingliani, DIPRO Champhai District kaihhruai ah hian Dr. Jane R.Ralte, State Nodal Officer, Mizoram State Tobbacco Control Society in zuk leh hmuam chungchang leh a kaihhnawih hrang hrang te Power Point hmanga sawiin Mizoram dinhmun a tarlang a, Mizoten Vaihlo kan hman nasat zia sawiin kan nunah hian a bet tlat emaw tih mai tur a ni a, India ramah pawh a hmang nasa ber state kan nih phah a ni tiin Global Youth Survey (GYTS) in kum 2001 a Mizoram high school naupang 2295 atanga zirchianna an neih report ah chuan naupang 54 % in vaihlo eng chi pawh an hmang a, heng zinga 23 % te hian mei an zu tan tawh a, hetiang anih avang hian Mizote zingah cancer vei kan tam phahin thihpui hial pawh kan tam tawh hle a ni a ti a. Khapna dan te kan sawi ngun tawh avangin mipuite pawhin kan hre thawkhat viau tawh a, kan hmalakna avangin phallohna hmuna meizu lui te pawh kan tlem sawt tawh hle a ni tiin an hmalakna kawnga press mite tawiawm thatna ah lawmthu a sawi a. Champhai District chu kawng hranga tehin puipunna hmuna meizuk tlemna ah pahnihna a ni a, Mamit District chu pakhatna a ni a ti. Pu Jane R. Ralte hian vaihlo hman avanga natna thleng thei chi hrang hrang te leh second hand smoke chungchangte pawh a tarlang nghal bawk a ni.

He meet ah hian Dr. C. Vanlalhlua, Member Secretary, Champhai District Anti-Tobacco Squad in Champhai District chhung hma lak tawh dan report a pe a, Inrinni zing apiangin Bazarpui ah an duty thin thu sawiin Champhai khawlai dungah chawlhkar khatah vawi khat duty thin  tur thu a sawi a. Kumin January ni 31 thlenga Dan bawhchhia an man tawh zat chu 314 an tlin tawh thu leh pawisa chawi tlingkhawm pawh Rs. 12,035 a nih tawh thu a tarlang bawk a ni. Pi Mary Lalthansangi Sailo, District  Coordinator pawhin MJA member te nen inkawmhona hun tha tak leh thawhhona tha tak an neih avangin lawmthu a sawi bawk a ni.

Meizuk phal lohna hmun, a bikin puipunna hmun hrang hrang - Damdawi In, Bazar, Restaurant, Office, Hotel etc ah te meizuk phal lohna signboard/ signage tar vek tur a ni a. Heng hmuna  tar lote chu Dan ang hrem theih an ni. Meizuk phal lohna hmun a meizu te chu dan anga hrem theih an ni bawk. Zuk leh hmuam chungchanga hriattur pawimawh hrang hrang te a lem nena entirin chipchiar takin he meeting ah hian sawiho a ni.