Zuk leh hmuam dona kawngah Mizoram sawrkar chuan hma nasa takin a la chho mek a, chumi bawhzui nan chuan Bloomberg Initiative to Reduce Tobacco Use, New York te nen thawhho dan tur kawng ngaihtuah a ni in Tobacco Control Grant hnenah grant hmuhtheih nan dilna siam a ni a. He grant hmu tur hian khawvel pum a ram hrang hrang atangin dilna thehluh a ni a, he dilna thehluh hi ngun taka na lo ngaihtuah hnu in Funding hmu turin India ram atangin Mizoram chauh hi heng diltu tam tak zing atang hian thlan chhuah zingah vanneih thlak takin telh ve a ni a. Hemi chungchanga thawhhona tur MoU rawn ziakfel tur leh kalpui zel dan tur sawihona nei turin International Union Against Tuberculosis and Lung Disease, New Delhi lam atangin Dr. Rana Jagdeep Singh, Technical Adviser leh Mr. Balasubramanian Gopalan, Contracts Administrator te rawn tirh an ni a. Anni hian vawiin 27.2.09 hian Health Minister Pu Lalrinliana Sailo chu a office ah hmu in vaihlo dona kawnga chak zawk a hmalak dan tur sawipuina neih a ni a. Health Minister pawhin chak taka hma an lak zel tur thu leh thawhhona tha tak an neih chhoh zel pawh a beisei thu mikhual lo kalte hi a lo hrilh a ni.