2475/2025-2026
Siaha, 2nd December, 2025: Vawiin chawhma dar 11:00 AM khân District Social Welfare Office, Siaha District buatsaihin Mary Hechia Residential Special School, Zyhno, Siaha District-ah 'International Day of Persons with Disabilities 2025' hman a ni a, Department Official bakah zirlai naupangte leh an chhungte, MTP, MCHP hruaitute leh khawtlang hruaitute an tel a ni.

District Social Welfare Officer, Siaha Pi LS Lalbiakzuali chuan thu sawina neiin an hun hlu tâk senga kal khawm zawng zawngte chungah lawmthu sawi hmasain 'International day of persons with Disabilities' hi kum 1992 aṭanga hman ṭan niin kum tin December ni, 3 - ah hman ṭhîn a ni a, remchan zawkna avangin Siaha District - ah chuan vawiinah hman a ni, a ti. Rualbanlote dikna chanvo hrang hrang tarlangin, an dikna chanvo an neih theihna turin nu leh pa, khawtlâng hruaitute leh Tlawmngai Pawl te pawhin mawhphurhna lian tak an nei ve a ni, a ti a. Sawrkarin rualbanlote tana inziahluhna tur a siam unique disable ID (UDID) a inziak lut tur pawhin anmahniin an tithei lo va, a nachang pawh an hre lo vang; chutih hunah chuan a fingvar zawkin bengvar an chhuah a ngai hle tiin, kalkhawmte chu rualbanlote tána awm reng tûrin a sàwm a ni.

Mary Hechia Residential Special School - ten rualbanlote hmakhaw ngaia mahni sum leh pai insengso va school an kalpui chu lawmawm a tih thu DSWO hian sawiin, 'mi tam takin an enliam mai mai rualbanlote ngaihsaka an buaipuina zawng zawng leh an hnathawh ropui a tih thu a tarlang bawk.

Pi LS Lalbiakzuali chuan Rualbanlote buaipuitu hmun hrang hranga mite chu sawrkar leh department-in a hre reng a, ṭanpui leh chhawmdawl kawngah pawh theihtawp a chhuah mêk zel tih sawiin, zirlai naupangte Christmas thilpekah 'Blanket' a hlan nghal ṭheuh a ni.

Vawiin hun hmanna hi Pi TT Sime-i, Mary Hechia Residential Special School Principal-in a kaihruai a, School naupang te'n an thiam thil an entîr a; District Social Welfare Office, Siaha staff Pu NG. Lalbiaknunga chuan lawmthu sawina neiin hun a khar.

International Day of Persons with Disabilities- hi kum tin December ni 3- ah thupui thlan bik nei hman thin a ni a. Kumin thupui chu 'Fostering disability - inclusive societies for advancing progress' tih a ni.