Vawiin zing dar 10.30khan Mizoram Veterinary Service Association (MVSA) chuan Berawtlang-a Art & Culture Department auditorium-ah annual conference vawi 27-na an hmang a; he hunah hian Pu R. Lalzirliana, Home Minister chu khuallian a ni a, Animal Husbandry & Veterinary Department minister Pu Nihar Kanti Chakma chu khualzahawm a ni.
Pu R. Lalzirliana chuan AH&Vety. Department hnuaia hnathawktute pawimawhzia sawiin, "Mizote  hi pianphungah hnam dang aia te zawk tur kan nih lohzia chu thangtharte pumruaa an len sawt zia  leh an hmelhmai nalh tak zia hian a tichiang a. Hei hi Mizoten ei leh in-a fimkhur leh hriselna  lama inuluk nachang kan hriat vang niin a lang. Ei leh in thianghlim min petute chu nangmahni hi  in ni a; in rawngbawlnaah chiang ula, mahni hna sitna nei suh u" tiin MVSA member-te chu a fuih. Home Minister chuan sawrkar hnathawkte chu hlawh ngawr ngawr ngaihtuah lo a mahni rawngbawlsak mipuite tana malsawmna nih a tulzia sawiin, "Miten min chhiar a, min thlir reng a; kan awm dan zawng zawng an hai lo. Pulpit tlangah thu tha tak sawi mah ila kan nunah a lan chhuah loh chuan mitten hnunglam atangin min nuihzat a, min ngaisang lo" tiin palaite an hnaah rinawm turin a chah a. Democracy ramah chuan politician-te chu  mipuite tana tha tur leh inkaihhruaina atana an phak tawka ruhrel duangtu an nih thu sawiin, a taka in sa pum tur chu sawrkar hnathawkte an nih thu  a sawi a."Sawrkar hna chu sawi ni lova a thawha thawh chi a ni"  Home Minister chuan a ti.

Minister Pu Nihar Kanti Chakma chuan, "AH&Vety Dept. hian kalphung thar kan mamawh a, chuvang chuan kan kal zel dan tur duangtu tur Expert Committee pawh din chhoh mek a ni. Group A officer tamna pawl kan nih chuan Mizoram tan pawh kan thawhkhlawk tur a ni" a ti. Pu Nihar Kanti Chakma chuan, "Kan department hi mipuite
hnena sa thianghlim petu kan ni a, chu chuan mihring hriselna bulpui a hril nghal a ni. A bik takin kan thalaite hnenah sa hrisel leh thianghlim keiniin kan pek loh chuan infiamna lamah pawh mi chak leh hrisel a awm theih dawn loh avangin NLUP hnuaia ranvulh thlangtute mai bakah Catch Them Young policy thlengin a hlawhtlinnaah mawh kan phur a ni" a ti bawk.

Vawiina Mizoram Veterinary Service Association khawmpui hi an pawl president Dr. 
Lalremliana chuan a kaihruai a; Pu T. Sangkunga, AH & Vety. Secretary chuan a telpui bawk. Pu T. Sangkunga chuan, "Sawrkar hna hi a thawha thawhpun chi a ni a; taima tak  leh remhriatna nena tankawh a tul a ni" a ti. Chawhnu lam hun thenah khawmpui chuan "Mittlung taka mahni mawhphurhna hlen" tih thupui hmangin zirhona an nei a; an service chungchanga siamthat ngaite pawh an rel nghal bawk. MVSA-ah hian member 113 an awm mek a; inkhawmpuiah hian officer pension tawhte hnenah chawimawina thuziak hlan an ni. 

AH&Vety Department hian kuminah Central sawrkar atanga sum an dawn hmangin district tinah sa talhna leh sawngbawlna din a tum a; hei bakah hian ran enkawlna hospital leh dispensary pawh chei hnum leh thuam that a tum a, NLUP-a ranvulh thlangtu chhungkuate tan ranchaw chinna tur pawisa pawh Central sawrkar atangin a hmu tawh a ni.