Art & Culture Minister Pu P.C.Zoramsangliana chuan tunlai khawvelah mahni sum lakluh aia sanga inchei leh thil dang chi hrang hranga hautak pui puia inthuam chin hi a veiawmin, ngaihhlut leh ngaihsan tur dik tak hriata chawimawi phu te chawimawina chang hriat hi kan tih tur a ni, a ti. He thu hi Lalnuntawma Fanai lehkhabu ziak 'Thangchhuah Tlang' tih vawiin chawhnua I&PR Auditorium-a a tlangzarhnaah a sawi a ni.
Minister chuan he lehkhabu phek 200 zeta chhaha mi hlawhtling hrang hrang 9 te chanchin a lo hriat ve dan te sawichhuakin an tumruhna leh thawhrimna avang chauhvin an hmabak an hlen thei a ni, a ti a. Thu ziak miten hetiang chawimawi tlak te pholang a, lehkhabu tha tak an buatsaih chu thil lawmawm tak a ni tiin hei hian hnam zahawmna a hringchhuak thin a ni, a ti bawk.
