Vawiin chawhma dar 11 khan Champhai District-ah ‘Kangmei Ven Hapta’ (Fire Prevention Week) hman tan niin, a hawnna inkhawm, Govt. Champhai College Multipurpose Hall-ah buatsaih niin he hunah hian Govt. Champhai College Principal Pu Lalnunmawia chu Khuallian a ni. Kumin Kangmei ven hapta atana thupui thlan chu ‘Ram tikanglo turin mitin i fimkhur ang u’ tih a ni.

Khuallian Govt Champhai College Principal Pu Lalnunmawia chuan fimkhur tawk thin loh avanga thal chhung reilotea  kang mei chhuak thin chu pawi a tih thu sawi a. Ram kanna chhan ber chu Lo, Huan leh Leipui hal dawna mei lam sial that loh vangte, ram vak leh mi kuthleite vang a nih thu a sawi a.  Kumtina ram kang thin chuan tuihna a ti kanga, thing leh mau, kan nitin nuna mamawhte thlengin a ti tlem thin a ni, a ti a. Ram ngaw chereu avangin nungchate chenna leh eitur chenin a lo tlabal zo ta a ni, a ti a. Lei thate a lo luangral zela, hei hian buh leh bal thar chhuah kawngah pawh nasa takin harsatna a siam phah bawk a ni, a ti a. Kalkhawm mipuite chu ram kang ven kawnga mitinte mawhphurhna chu  ngaithla liam mai lova a taka nunpui thin turin a chah a. Invenna chu tihdamna aia a awlai zawk avangin ram kang ven kawngah nasa zawka tan la zel tura kalkhawmte chu sawmin, Champhai District chhunga ‘Kangmei Ven Hapta -2018’ chu lawmtakin a hawng nghal a ni.

Vawiin programme hi Champhai DFO Pu C.Lalbiaka, Member Secretary, District Level Committee on Fire Prevention chuan a kaihruai a. Kalkhawmte lawmna thu sawiin Programme hman anih chhan leh pawimawhnate a sawi a. Nikum lama kangmei ven kawnga Forest Department hmalakna leh kumin atana hmalakna turte a report a. Forest Department Report-in a tarlan dan chuan Champhai District chhungah khaw 101 a awm a. Chhungkua 23,450 zinga 8,736-te chu Lo neia eizawng thin an ni a. Nikum chhung khan Khaw 10 velah kangmei chhuak, Forest Fire Incidence a awm a ni. Village Fire Prevention Committee khaw 45 ah din niin Sikul 49 leh Khaw 48-ah te Kangmei laka inven dan Campaign neih a ni bawk. Nikum khan March ni 15 hmaa Lo hal tur tih ni mahse ruahtui tlak tam vangin April Ni 1 thleng khan pawhsei a ni a. Kuminah pawh khauh taka Kangmei Ven Hapta hi kalpui leh tum niin March ni 15 hmain Lo hal vek tur a ni a. Leipui leh Huan bikte chu February thla chhunga hal kim vek hman tur a tih a ni. Lo, Huan leh Leipui hal turte chuan tha taka mei kawng sial vek tur niin VC leh khawtlang hruaitute phungbawmna tel lova hal rikngawt loh tura tih a ni bawk. Kangmei Ven Hapta chhung hian hemi kawnga thawhhlawk bik khua leh Chanchinbu hnenah lawmmman hlan tura ruahmanna siam a ni bawk. Champhai DFO chuan ramkang laka venhimna hna thawh chu Forest Department leh tlawmngai pawl thenkhatte chauh hna pual a nih loh thu leh, mitinin mawhphurhna kan nei a, fimkhur kan zir a pawimawh thu a sawi a. Dan pawisalo a ram tikangtute chu na taka hrem an nih tur thu a sawi bawk.

He huna thusawitu dang Pu K.Lalmawia, Chairman, Champhai District VC Association pawhin ram kangin nghawng thalo hrang hrang a thlen thin thu leh a chhan tlangpuite a sawi lang bawk a ni. Pu C. Lalhnunpuia, Honarary Wildlife Warden, Champhai District chuan he hun hi lawmthu sawiin a khar a ni. 

Fire Prevention Week hawnna inkhawmah hian Sorkar Pisa hrang hrang hotute, khawtlang hruaitute leh chanchinthar lakhawmtute bakah College zirtirtute leh zirlaite an tel tha hle a ni.