Union Ministry of AYUSH leh Mizoram sorkar depatment of Health & Family Welfare (AYUSH) tangkawpin ni 4 chhung awh tur an buatsaih, AROGYA Mela 2015 vawi 4-na chu vawiin khan Chief Minister Pu Lal Thanhawla’n Assembly Annexe Conference Room-ah hawngin, building hnuaia car parking-na hmuna exhibition pawh a hawng nghal.

Chief Minister chuan Hriselna Kutpui, Arogya Mela hi Mizoramah vawi li hman tawh anih thu sawiin, ala tel ve zel a ni a ti a. Hetiang Mela neih thin hi Mizoram mipui ten kan tangkaipuiin kan hlawkpui hle a a hriat thu a sawi a. AYUSH hi Mizoramah kan la hmelhriat lutuk rihlo nain, a lar chho tan mek a ni a ti a. India chhulchhuak, Indian system of medicine AYUSH hi kum tam tak kalta atanga India miten an lo chhawr tawh a ni a, hriselna tha nei tura inenkawlna tha tak pakhat a ni a ti. Hun inher danglam zelah kan nunphung leh chetzia te lo danglamin, inenkawlna lam pawh a zau thei ang ber kan duh chho a, abikin khawthlang lam mite pawhin an rawn ngaihven hle tawh a ni a ti. AYUSH hi natna benvawn leh inkaichhawn theih loh natna enkawl nan a that bik thu mithiam te chuan an sawi a ni a ti.

Chief Minister chuan sorkar-in mipuiten hriselna tha an neih hi a duh ber a ni tiin, he hriselna kut pawh hi hriselna tha neih a hlutzia an hriat tharna tura tih a ni a ti a. Hnam changkang leh ropui ni tur chuan hriselna tha neih a pawimawh hmasa ber a ni a ti a. Mizote hi ei leh inah kan fimkhur tawk loh avang leh zuk leh hmuamah kan fihlim loh avangin kan hriselnain a tuar nasa a, damlo enkawl nana sorkar-in sum a sen te hi namenlo tak a ni tiin, a sen tlem dan tur ngaihtuah mek a ni a ti. Chief Minister chuan mitinte chu hriselna tha neih tum tura tan la turin a sawm nghal a ni.

Khualzahawm Pu Lal Thanzara, Minister of State for Health & Family Welfare chuan AYUSH in AROGYA Mela a buatsaihna chhan ber chu AYUSH hmalakna pholang a, mipui ten hriselna tha neih a pawimawhzia tihlan a ni a ti a. Ram changkang tehna pakhat chu hriselna a ni a, he tehnaah chuan Mizote chu kan sanglo hle a ni a ti a. Nausen thi (infant mortality rate) tih tlem a ngai thu sawiin, hei hi chona lian tak a ni tiin, hriselna lamah nasa taka tan kan lak hle angai a ni a ti. Minister chuan tunah hian AYUSH Doctor 52 an awm thu sawiin, hmun kilkhawr zawkah te dah tum an ni a ti a, CHC leh PHC ah te dah an nih thu a sawi a. Allopathy doctor pakhat awmnaah chuan AYUSH Doctor pakhat zel dah tum anih thu pawh a sawi a. Directorate hrana awm tura hmalak mek a ni a ti a. Ayush damdawite hi side effect neilo a ngaih anih thu sawiin, Mizorama ramhmul dawidawi thahnem tak kan neihte hi tha taka humhalh turin mi zawng zawng a sawm nghal bawk a ni.

AYUSH hi Indian System of Medicine a ni a, A hi Ayurveda niin, Y hi Yoga, U hi Unani, S hi Siddha, H hi Homeopathy tihna a ni a, Homeopathy erawh hi chu German chhuak a ni.

AYUSH hi Mizoramah langsarlo takin kum 1984 daih tawh khan bul tan a ni a. Kum 2000 ah Mizo Ayush doctor an rawn awm tan atang khan muaml zawka kalpui tan a ni a. Tunah hian CHC leh PHC ah te Ayush doctor-te hi dah an ni a, hospital-ah OPD pawh hawn a ni tawh a ni. AYUSH Hospital puitling khum 50 awmna tur Thenzawlah peih fel tep tawh a ni a, kumin hian hawn hman beisei a ni.

Hawnna inkhawmah Chairperson Dr.K.Ropari, Principal Director & Director (AYUSH), H&FW Deptt. in kalkhawmte lawmna thu a sawi a. Union Ministry of AYUSH aiawhte bakah sawm bikte an kal tha hle a, Dy Speaker Pu R.Lalrinawma, Parliamentary Secretary Pu K.Lalrinthanga leh MLA & Chairman, Mizoram Youth Commission Pu T.Sangkunga te an tel bawk a ni.