National YMCA’s of India hnuaia North Eastern Region YMCA te chuan May 1, 2015 khan Regional Women’s Assembly hawnna inkhawm, Synod Conference Centre, Aizawl ah an hmang. He Women’s Assembly hi Aizawl YMCA in lo dawngsawngin, a hawnna inkhawm hi Pu Lalrinmawia Ralte, Environment & Forest Minister leh Chairman, NEIR YMCA hovin neih a ni.
Pu Lalrinmawia Ralte chuan Aizawl YMCA in Regional Women’s Assembly a thleng thei chu lawmawm tiin kohhran leh pawl hrang hrangte taima taka an thawh thinna Mizoram chhungah hian thalaite tana khawvel zau zawka rawngbawlna ngaihtuahpui leh hemi atana inbuatsaih hi Aizawl YMCA chuan a tum ber a ni, a ti. India hmarchhaka YMCA intelkhawm chuan ram chhung hmun dangte leh khawvel huap pawha huhang a neih zel theihna tura hmeichhiate rawngbawlna a pawimawhzia sawiin, nasa leh zuala tan la turin kalkhawmte a fuih a ni. 
Hawnna inkhawm hi Mizoram Sub-Region Chairman Pu Zoliana Royte chuan kaihruaiin, thupui atan Ephesi 2:10 ‘Hands to Work, Hearts to God’ an hmang a. He thupui behchhan hian National YMCA hnuaia Women’s Empowerment & Gender Concerns Committee member Pi Rini Tochhawng chuan thu a sawi bawk.
 
Regional Women’s Assembly hi May ni 1 atanga May ni 3, 2015 chhunga neih tura ruahhman niin he hun hmang tur hian India hmarchhak atangin palai engemawzat an rawn tel a. Assembly chhung hian thupui thlan bik zirhona leh practical exposure hun te neih tum a ni.