Mizorama development projects, schemes leh programme hrang hrang Rs.50 Crore chunglam chin senso-na, chak tak leh a hun taka zawh a nih theihna tura endika viltu tur Chief Minister Pu Lal Thanhawla kaihhruaina hnuaia din, High Level Monitoring and Surveillance Committee I (HLMSC I)chu vawiin chawhnu khan a office cabinet room-ah meeting pawimawh tak an nei.

Meeting-a thuhma a sawiah Chief Minister chuan Mizorama project leh scheme tam berte chu Centrally Sponsored Scheme (CSS) a ni tiin, DoNER hnuaia Non Lapsable Central Pool of Resourses (NLCPR) ah leh NEC hnuaiah te project kan neih bawk thu a sawi a. Keimahni State ang chuan NLUP tih loh chu project kan neilo a ni a ti a. Heng project leh scheme hrang hrangte hi vil ngun a pawimawh avangin he High Level Committee pawh hi din a a ni a ti.

Chief Minister chuan NLCPR leh NEC hnuaia scheme te hi a hun taka zawh anih theihna turin he committee hi siam a ni a ti a. Project te hi te reuh te tea thensawm lovin, lian tham deuh mahse tlem deuh zawk pawha siama, a ram leh hmun te tifel hmasa vekin, a kalpuinaah pawh kan chak zawk deuh a beiseiawm a ni a ti a. Project lian Rs 50 Crore aia tam kalpui department a tarlanah, UD&PA (Swachh Bharat Mission) atan Rs.137 Crore, PWD ah Rs.1328.40 Crore, P&E ah Rs.297.90 Crore, NLUP (Special Plan Assistance) ah Rs.1526.14 Crore leh School Education (CSS - SSA Mission) ah Rs.208.36 Crore dah a ni a ti a. Project Rs.50 Crore hnuai lam chin enfiah turin Mizoram sorkar hnuaia UD&PA in a kalpui thu a sawi bawk a ni.

HLMSC I meeting-ah hian Mizorama development projects leh schemes te hnathawh dan leh a hun taka zawh anih theihna tura hmalak dan tur ngun takin an thlirho a.Projects uluk taka a bulthut atanga ruahmanna tha tawklo a awm thin avanga a hun taka zawh hman loh awm thin te, sum ruahman dan fel tawk loh laite leh state matching share requirement ruahmanna fek zawk neih dan te an rel a.Project leh scheme te tithuanawp thei tur risk assessment fel tak nei thin tur leh chu risk tih tlem dan tur ruahmanna siam ni se an ti a.Loan hmanga development projects te fimkhur taka kalpui leh high impact nei zawnga kalpui nise tihte an rel a ni.

HLMSC I hi Mizoram sorkar ina Approach to Development Comprehensive Growth Strategies alo pawm tawh hmalakna pakhat a ni a.A hnuaiah hian HLMSC II awm bawkin Chief Secretary kaihhruaina hnuaia awm, Rs.50 Crore hnuai lam project te a huam a ni.

Meeting-ah hian Finance Minister, State Planning Board Vice Chairman, Chief Secretary, Principal Secretary to Chief Minister, Finance Commissioner, Planning Department Secretary, PWD,PHE leh P&E Engineering in Chief te bakah official pawimawh dang an tel a ni.