Nizan khan Chief Minister Pu Lal Thanhawla’n Thuampui Helipad-ah Sericulture Department-in North East Region Textiles Promotion Scheme (NERTPS) kaltlanga hma lakna thar tur an neih – Integrated Muga Silk Development Project (IMSDP) hawnna programme a hmanpui a. He huna buatsaih silk puan tih larna nan silk puantah hmanga Mizo puan tah leh silh leh fen dangte phochhuahna Silk Couture tih pawh a hmanpui nghal a. He programme ah hian Larsap Lt. Gen. Nirbhay Sharma leh Minister thenkhat te an tel bawk a ni.

Chief Minister Pu Lal Thanhawla chuan  Muga silk thatna hmun leh a hmunpui berah ngaih Assam chu sik leh sa inthlak danglamin a tihbuai nasat avangin an muga siamchhuah zat chu nasa takin a tlak hniam thu a sawi a. Hei hi Silk lama mithiam ten zirchiangin 2012 leh 2013 khan Nagaland leh Mizoram ah te muga enchhin nan hmalakna an nei a, he pilot project ah hian tlang ramah nipui laiin muga pangang ten cocoon an siam tha thei bik tih hmuhchhuah anih thusawiin hemi avang hian Sawrkar Laipuii chuan NERTPS kaltlangin sericulture atana zau zawka hma lak a rel ta a ni, a ti a. NERTPS chu sericulture hmanga eizawngtute tan malsawmna anih theih thusawiin NLUP ah pawh sericulture hi ngaihpawimawh a ni, a ti.

Sericulture leh hemi hmanga eizawngtute hamthatna turin Sawrkarin theihtawp a chhuah zel dawn a, NERTPS hnuaia remchannate hi kan hman tangkaia sum leh pai lakluh nan kan hman thiam a pawimawh dawn a, sericulture farmer-te hi nasa leh zawka tan la turin ka chah duh a ni, a ti. Khua Nu in sik leh sak inthlak danglam avanga kawng danglam taka mal min sawmna hi kan hman tangkai thiam a ngai a tiin Sik leh sak inthlak danglam global warming leh kan chheh vela boruak inthlak mek climate change hi lehkhabu a thu chauh ni tawh lovin mitin a takin kan hmachhawn thil a ni ta a, kan nitin nunphung hi a nghawng chhoh zel dawn avangin engtia hma lak chi nge tih hi chu kan ngaihtuah tlan a hun takzet a ni, a ti.

Thusawitu dang Sericulture Department enkawltu Minister Dr. B.D. Chakma chuan NERTPS kaltlanga Project pahnih hnuaia hma lak tawhna te sawiin Project thara hma lak tum dan leh a huam chin tur te a tarlang a ni.

Silk Couture ah hian Mizo designer pathum – Pi Lucy Sailo (Lucy’s Catalogue) Pu Charlie Mathlena (Heritage Mizoram) leh Pi Laltanpuii (Zozia Silk, Tlangnuam) te silk puan kutchhuak pholan a ni.

Sericulture Department hian NERTPS hnuaia Project pahnih – Integrated Sericulture Development Project (ISDP-NERTPS) leh Intensive Bivoltine Sericulture Development Project (IBSDP-NERTPS) an kalpui mek a, tunah Project thar kalpui tur hi Integrated Muga Silk Development Project (IMSDP-NERTPS) a ni a, hemi atan hian cheng nuai 1352.09 ruahman a ni. ISDP-NERTPS ah khan cheng nuai 3249.20 ruahman niin beneficiaries 600 an awm a. IBSDP-NERTPS atan cheng nuai 3014.16 ruahman a niin beneficiaries 1000 an awm a, project thar  IMSDP-NERTPS hian beneficiaries 500 tuam beisei a ni. NLUP leh hmalakna dangah kaltlangin sericulture farmers 2954 te hi tuam an lo ni tawh bawk a ni.