Vawiin khan Zoram Entu Pawl (ZEP) leh Ferrando Integrated Women Development Centre (FIWDC – Peace Home)-ten International Day for Persons with Disability puala Falkawn Cultural Centre-a hun an buatsaih chu Parliamentary Secretary Pu K.S. Thanga chuan khuallian niin a hmanpui.

Parliamentary Secretary chuan rualbanloten an nitin nunphunga harsatna an tawh thin te tikiam a, an tana hmalak chu Sorkarin a ngaih pawimawh thu a sawi a. Sorkar building leh Biak In hrang hrangah rualbanlo te tana chet vel awlsam theihna tura hmalak a tul thu sawiin, sorkar building sak thar turah pianphunga rualbanlonte tan kal awlsam zawk tur te plan ah telh anih thin thu leh, Sorkar laipui atanga scheme siam zulzuiin sorkar building lun deuh te chu wheelchair a lawn theiha siam a hmalak a nih thu a tarlang a ni. Rualbanlo te chu thil hrang hrangah mi tluk loh an nih theih zia sawiin, awm mai mai lo leh mi khawngaihna nghak ringawt lovin, an tih ve theih chin leh thiam thil te chu phur taka um zui zel zawk turin khuallian chuan a chah a ni.

Pu KS Thanga hian rualbanlo te hmanrua (aids and appliances) mi 41 hnenah a sem nghal a ni. Hun hi Pu C. Lallianzama, President, Aizawl District Disabled People Organization (ADDPO) chuan a kaihruaiin, Father Lawrence Kennedy, Director, Zoram Entu Pawl chuan thu sawi bawkin Pi Mary Lalawmpuii, Secretary, ADDPO chuan report a pe a.Vawiin programme-ah hian ADDPO hnuaia rualbanlo mi 250 an kalkhawm a ni. Chawhnu lamah rualbanlo te pualin sports & games hmanga intihhlimna hun hmangin chawhlui kil ho nghal a ni.

ZEP leh FIWDC hi Aizawl District Disabilities Persons Organization in khaikhawm in, Roman Catholic enkawlna hnuaia awm an ni a. Heng pawl pahnih te hian khua 32 tuam in, tun dinhmunah rualbanlo 537 an enkawl mek a. Dinhmun tha zawk leh eizawnna ngelnghet an neih theih nan hma an lakpui thin a. ZEP hian Tlangnuam ah Headquarter neiin, FIWDC hian Durtlang ah Headquarter an nei a ni.