Nimin khan Central Silk Board, Guwahati Joint Secretary (Technical) Pu Sarat Deori leh North East Region Textile Promotion Scheme (NERTPS) Evaluation Team Chairman Dr. Nirmal Kumar te chuan Integrated Sericulture Development Project (ISDP) hnuaia Chhingchhip Mualpui Sericulture Cluster an tlawh a, hnathawh dan leh hmalak zel dan turte an enpui.
Pu Sarat Deori chuan Mizoram-ah Integrated Muga Silk Development Programme hawng tura lokal an nih thu leh chumi paha Integrated Sericulture Development Programme hmalakna te an en nghal thu a sawi a. Tin, he Scheme hnathawh dan endiktute pawhin Chhingchhip Mualpui Cluster chu an lo entawh thin thu leh hmalakna te chu lawmawm a tih thu a sawi a, he hmuna pangang vulhtuten a chiah a tui la lova, a keu tawh sa, tha taka damchhuak ngei tur chauh an dawn theih nan a tui tihkeuna hmun sak belh a nih tur thuleh hna tan mai theiha peih thawkhat a nih thu a sawi bawk ni. Dr Anil Kumar, Chairman, Evaluation Team, NERTPS pawhin Chhingchhip Mualpui Cluster hmalakna chu hmuhnawm a tih thuleh a theih ang anga hmalakna zauh zel a duh thu a sawi a. Pangang vulhtuten hlawk taka an vulh ngei theih nan a chaw hmun tihzauh a pawimawh thu a tarlang a ni.
Chhingchhip Mualpui Sericulture Cluster ah hian ram tin 13 hmunah pangang chaw chin khah vek niin chhungkaw 12 ten pangang vulhin kumin atang khan bul an tan a. Heng chhungkaw 12 te hnenah hian Integrated Sericulture Development Project hnuai atangin Pangang vulhna in te, Thlam te, Pangang vulhna hmanraw mamawh zawng zawngte, tui lak te leh Solar lamp chenin a thlawna pek vek an ni a, an tharchhuah ang angte chu an Thlamah Department lamin an leisak nghal zel bawk a ni. Tin, helai pangang vulhna hi kumtin zauh belh zel tuma ruahmanna siam a ni.
Nimina Chhingchhip Sericulture Cluster Farm tlawhtute hi Pu Sarat Deori leh Dr Anil Kumar bakah Central Silk Board atang hian Pu Money Isaac, Deputy Secretary (Technical) te, Pi Arzia Parveen, Consultant te, Pu BN Chowdhury, Scientist C, REC, te an ni a, Aizawl atangin Sericulture Director, Pu Lalrinmawia, Joint Director, Pu Lalrozama leh ISDP Mizoram Project Coordinator Pu Lalremsiama ten an rawn tawiawm a. Serchhip District Sericulture Officer Pu V Zothansanga leh a thawhpuite leh Pangang vulhtuten an lo dawngsawng a, pangang vulhtute hian an mamawh hrang hrang Pu Sarat Deori hnenah hian an lo thlen nghal a ni.
