Ni 2.12.2016 (Zirtawpni) khan World bank Road, Darnghaki Thih kawn atanga Tachhip khaw panna approach Road cheng Nuai 108/- senga siam chu Parliamentary Secretary Pu K.S. Thanga’n a hawng a, Tachhip khaw Intawhkhawm Runpui a hmanpui nghal a ni.

Khuallian chuan thu sawiin Tachhip khaw mipuiin Kum 45 dawn lai an lo nghah tawh Sibuta lung kawng peihfel a lo ni thei ta chu lawmawm tiin he kawng thar hian Tachhip khaw mipui te tan malsawmna leh hmasawnna tamtak a thlen ngei a beisei thu a sawi. Rual el pha tur leh hmasawnna khuangrual tur chuan in kalpawh na kawng tha a pawimawh thu a sawi a. He kawng siam nan a tha leh zung seng tu te tarlangin PWD in chak taka hna a thawh a vangin lawmthu a sawi a, Tachhip khaw mipuite inlungrualna chu chhinchhiah tlak tiin Chief Minister zahawm tak Pu Lalthanhawla leh Finance Minister Pu Lalsawta te hriathiamna leh duhsakna chu lawawm a tih thu a sawi bawk a ni.

Bialtu MLA chuan a bial chhung hmasawnna tura hmalakna te tarlangin, Crore 66 senga siam tur mat lui kan a Lamchhip-Serchhip-Samtlang kawng sial tura hmalek chho mek a nih thu a sawi a, Crore 17 senga sial tur Hualngo-Samtlang-Hlimen kawng pawh NABARD ah proposal theluh tawh niin thawh tan theih tep a nih thu a tarlang tel bawk a. Heng kawng 2 sial na tur sum hi a vai a Central Sawrkar atang a dawn tur a nih thu a sawi a ni.

Er. Lalbiakthanga EE, PWD chuan Technical report pein, KM 2 a thui Kawng siam nan hian cheng Nuai 108/- sen a ni a, kawng hi fur ruah dawl zo tur Plastic Cell filled niin, Tachhip atang a Aizawl panna kawng chu Km 4.50 in a ti tawi dawn a ni a ti.

Kawng hawn leh Intawhkhawm runpui hi Pu Ralkapthanga, President, Village Council, Tachhip in a kaihruai a Hlado Chham, Mal zai, Mizo lam chi hrang hrang leh tlai lama Ruaipui nen nilenga intih hlimna hun hman a ni a. He hun hi Tachhip khaw mipuite leh Tachhip khua a lo cheng tawh thin thahnem takin an tel pui a ni.