Nimin tlai khan Chief Minister Pu Lal Thanhawla hmaa ah Central YMA leh Tata Trusts hnuaia North East Intitiative Development Agency (NEIDA) te chuan Chief Minister’s Conference Hall-ah Swacch Bharat Mission (Gramin) hnuaia faina chungchangah mipui zirtira mipui te rilru sutthlek thlakna tur hma lakna hrang hranga thawhhona thuthlung an ziak.

Chief Minister Pu Lal Thanhawla chuan TATA Trusts hnuaia NEIDA ten CYMA thawhpuia faina chungchanga hma lakna tur thawhhona thuthlung an ziak chu lawmawm a tih thusawiin Tata Trusts ten Mizorama hmasawnna ngaihtuaha phal taka sum leh paia thawha, Mizoram leh mipuite tan thil tha leh tangkai an rawn tih hi an fakawm a, an inpekna tihhlawhtling turin an thawhpui Department leh pawl ten theihtawp kan chhuah a ngai a. Animal Husbandry leh Vety lamah te, Zirna lamah te, Football hmasawnna atan tea Tata Trusts ten Sawrkar an thawhpui mek a, hengah te pawh hian thawhhona tha tak kan nei mek a, tuna faina chungchanga CYMA nen thawhhona pawh hi hlawhtling taka kan neih ka beisei a ni, a ti. Faina chungchanga Sawrkar anga hma lak chu Swacch Bharat Mission awm hma diah tawhin 1980 chho khan Clean Aizawl leh Clean Mizoram ang ten bultan anih thusawiin hemi avang pawh hian state dangte aiin faina leh thianghlimna kawnga hma kan sawn a, Mizoram pum hi pawna daileng awm lohna Open Defecation Free (ODF) ah kan puang tep tawh a ni, a ti. Prime Minister Pu Narenda Modi’an chak zawka Swacch Bharat Mission kalpui anih thei nan Chief Minister 12 te telna Sub Group a din a, Chief Minister Pu Lal Thanhawla hi Hmarchhak atanga he Sub-Group a Member awm chhun a ni. Tunhnaia khan he Sub-Group chuan an rawtna te chu Prime Minister hnenah an thehlut a, an rawtna te hi an pawm vek a ni. An rawtna zinga mahni inchhunga inthiarna lei lo te tan Panchyat inthlanna chhuh thei lo tura an tih chuan ram pumah fak a hlawh hle a ni.

He meeting tawite kaihruaitu PHE Secretary, Pu V. Lalremthanga, IAS chuan he thawhhona kaltlangin Mizorama pawl lian ber CYMA ten he ruahmanna hnuaia hmalakna an nei tur hian nasa leh zawkin faina kawnga mipuite, hma chak zawka min sawn tir kan ring a tiin thawhhona thuthlunga CYMA leh NEIDA te mawhphurna tur ve ve a tarlang bawk a ni.

Thawhhona thuthlungah CYMA aiawh hming ziaktu CYMA President Pu Lalbiakzuala chuan Tata Trusts anga pawl hmingthangin CYMA an thawhpui chu lawmawm a tih thusawiin a hlawhtlinna turin leh Mizorama nasa leh zawka faina leh thianghlimna kawnga thawk turin CYMA chuan theihtawp chhuahin hma an la dawn a ni, a ti.

NEIDA Executive Director Pu Dharani Ratno chuan kum 5 chhungin NEIDA hian Mizoram tan kawng hrang hranga hmalakna atan cheng vaibelchhe 18 a ruahman thusawiin cheng vaibelchhe 2 chu pek chhuah a ni tawh thu a sawi a. Kawng hranga Mizoram Sawrkar an thawhpuina te a tarlang bawk a ni.

Heng an hmalakna te hi Chief Minister in a phurphuiin theihtawp a chhuahsak thin thusawiin a chunga lawmthu a sawi a ni. PHE Engineer-in-Chief Pu Lalmuanzova’n lawmthu sawina neiin hun a khar a ni. He thawhhona thuthlung hnuaiah hian NEIDA in cheng nuai 15 in CYMA an tanpui dawn a, he sum hmang hian CYMA in Clean Mizoram Campaign kaltlangin faina kawnga mipui zirtirna hrang hrang an buatsaih dawn a, Branch YMA, Group YMA leh Sub-Headquarters hma lakna nei tha ber hnenah lawmman hlan a ni ang. NEIDA in capacity building leh training te buaipuiin CYMA hi an thawpui dawn bawk a. District pali – Serchhip, Kolasib, Champhai leh Aizawl a Swacch Bharat Mission (Rural) hnuaia District Coordinator te hlawh hi NEIDA in an tum mek a ni.

Thawhhona thuthlung ziahna ah hian PHE hotute, CYMA President Pu Lalbiakzuala leh a thawpui mi 8, TATA Trust leh NEIDA aiawh mi 4 bakah NEIDA State Consultant Pu Robert Romawia pawh a tel a ni.