Chief Minister Pu Lal Thanhawla chuan vawiin chawhnu khan Aijal Club-ah Rev. Dr. P.L. Lianzuala ziah ‘Zofate Chanchintha Rawn Hlantute’ tih lehkhabu a tlangzarh.

Chief Minister chuan ‘Zofate Chanchintha Rawn Hlantute’ tih lehkhabua Mizote chanchin thui taka chhui tel hi a ropui hle a ni, a ti a. He lehkhabu ropui tak hian Kohhran hrang hrangte min phuarkhawmtu leh inlungrualna thlentu nithei se a duh thu a sawi a. Zofate tana rotling ni tur lehkhabu, hah tak chung leh rim taka ziak a ni hi a lawmawm tak zet a ni, a ti.

Lehkhabu hi Rev. Dr. P.L. Lianzuala’n kum 6 chhung ziakin, ram chhung mai nilo, sapram leh USA ah te lehkhabu hrang hrang rawn kualin a fehchhuak thin a ni. Lehkhabu hi a kawm chhah a siam a niin, phek 478 a awm a, Rs. 500/- a hralh tur a ni.

Lehkhabu tlangzarh inkhawm hi Rev. Sangvela’n a kaihruai a.Chief Minister hi a nupui Pi Lal Riliani bakah Speaker Pu R. Romawia, Minister Pu S. Hiato, Parliamentary Secretaries Pu Lal Thanzara, Pu S. Laldingliana leh MLA Pu R. Lalrinawma, Pu Lalrobiaka, Pu R. Selthuama, Pu K. Lalrinthanga, Pu Joseph Lalhimpuia leh Lt. Col. ZS Zuala ten an tawiawm a ni.