Hmeithai Association hi a hming a tlawm naa, an thil tih a ropui a ni. He thu hi vawiina Mizoram Hmeithai Association (MHA) in Luangmuala Residential School for Priviledged Children-a an pawl in kum 2005 atan Dr. Durgabai Desmukh Award an dawn leh an School HSLC Result lawmna hun leh Guardian’s Day an buatsaihna function-a Social Welfare Minister Pu P.C. Lalthanliana’n a sawi a ni.

Minister chuan miharsa, mi chan hai, fahrah te, hmeithai fate tana an inpekna leh heng mi ten zirna tha an nei theih nana zirna in an hawng te, an hnathawh that avanga tum hnih lai mai Ram pum huap chawimawina an dawnte hi an entawntlak hle a ti a. An hnathawh te hi Mizoram in hria se tiin Sawrkar ang pawhin an rawngbawlna ah lawmthu a sawi bawk a ni.

Pu P.C. Lalthanliana chuan nuamsa taka lekha zir te hi an hlawhtling lo fo thin a, hrehawmna patlanga harsatna leh retheihna karah pawh tumruhna leh tuarchhelna nena lehkha zir thin te chu mi hlawhtling tak takah an chhuak thin a ni, tiin zirlai naupang te chu a fuih a. Mizoram sawrkar-in hmeithai 891 hnenah Widow Pension Scheme a pek mek thu a tarlang bawk a ni. Minister hian dekchi lian 4; thingpui no dozen 10 leh thleng 100 school tan hian a pe a ni.

He hun hmanpuitu dang Pi Zothankimi, Chairperson, Mizoram State Social Welfare Board pawhin thu a sawi a. Dr. Durgabai Desmukh chanchinte tarlangin MHA chu tlawmngai pawl tam takin an tluk lo a ni a ti.

Programme hi MHA Vice President Pi Helen Zikpuii’n kaihruaiin, MHA President Pi Veronica K. Zatluangi chuan inlawmna thuchah sawiin School Headmistress chuan School Report tawi a pe bawk.

Kumin November ni 5 khan President Pu Pranab Mukherjee chuan Rashtrapati Bhawan-ah Mizoram Hmeithai Association te hi Dr. Durgabai Desmukh Award for 2005 chu a hlan a. He hunah hian an President Pi Veronica K. Zatluangi leh a thawhpui dang 6 te an tel a ni. Hei bakah hian kum 2002 khan MHA hian National Child Welfare Award an lo dawng tawh bawk a ni.

Residential School for Privileged Children hi kum 1998 khan MHA hian din a, tunah hian Pawl V atangin Pawl X thleng awmin zirlai hmeichhe naupang 100 vel an nei a. He School hi adhoc-aided a hlankai ni tawh in, thawktu 11 (zirtirtu – 9; warden -1 leh Grade IV -1) an awm mek a ni. School-ah hian Zirna sang zawk Pawl 12 leh vocational course thenkhat hawn anih theihna tura Concept paper chu Social Welfare Department in a pawm tawh a, DPR buatsaih mek a ni bawk a ni.