Vawiin khan Kolasib ah Kolasib MLA Football Tournament 2012 kar hnih chhung khelh chu zawh a ni ta a.Kolasib bialtu MLA Minister Pu P.C Zoram Sangliana, Transport Minister chuan Tournament kharna hun hi a hmanpui a ni.

Thu sawiin Pu PC Zoram Sangliana chuan tluang taka MLA Cup,Kolasib District Football Association te buatsaih neih a ni chu lawmawm a tih thu sawi a.Kolasib mipui te chu inthlan te ramin a hmachhawn mek laia rilru fim tak pu tur leh tunge ram tana hna thawk tak tak tihte chik thin turin a chah a.Politician ten kan thusawi kan umphak em, khawtlang leh ram tan hna kan thawk em, kan thutiamah kan ding em tihte hi min teh nan hmang thin ang che u, a ti a ni.Infiammite chu rilru thianghlim tak pua inkhel turin a chah a.Chak leh chak lo nih dan pawh thiam turin a chah a ni. Pu Ramsanga chuan Kolasib khaw mipui te chu Kristmas hlim taka hmanga kumthar duhawm tak hmuak theuh turin duhsakna a hlan bawk.

Kolasib MLA Football Tournament kharna inkhawm hi Pu C. Thanhlira, Vice President, Kolasib District Football Association chuan a kaihruai a, Pu M. Zothanmawia, Match Commissioner in tournament chhunga thil thlengte leh a kaihhnawih report a pe a ni.

Tournament-ah hian Kolasib District chhung atangin Team 43 an tel a. Tournament buatsaih dawn khan bialtu MLA Pu PC Zoram Sangliana chuan player zawng zawng hnenah jersey leh mawza a sem a. Match hi nitin neiin Inrinni pawhin chhunzawm zel a ni a. Final match hma hian goal 156 tihluh a ni a,yellow card tum 74 phawrhin red card tum 10 phawrh a ni bawk a ni.

Kolasib Vengthar GSA leh Kolasib Diakkawn FC ten final an khel zui nghal a ni.