Chief Minister Pu Lal Thanhawla hmalaknaa department tin ten kalphung thar leh hmasawnna tura ruahmanna mumal an duante sawihona kal zelah, vawiin khan Minister Pu R. Romawia enkawl department thenkhat hotute Chief Minister office cabinet room-ah Chief Minister hian a sawipui.

Chief Minister chuan awmze nei leh mumal zawka sorkar a kal theih nana department tin ten ruahmanna thar an duante sawipui a duh vanga meeting hi ko anih thu a sawi nawn a. Sorkar hnathawk ten work culture tha leh work ethics an kalpui theih nan Administrative Training Institute a training neih tul a tih thu te sawiin, hei hian nasa takin nitin sorkar hnathawhnaah awmze nei leh fumfe zawka a puih theih a beisei thu a sawi a. ACR inziah sak chungchangah strict taka kalpui tul a tih thu sawiin, hnathawk tha peihlo leh mi zelthel te chu an nihna anga ziah sak mai tha a a hriat thu a sawi a. Hei hian kan kal zelna turah mi taima leh tha kan chhawr theih phah a beiseiawm a ni a ti. Sum inrenchemna kalpui a nih theih nan official thila phai kal tulna turah sorkar department hotute chuan Mizoram House Resident Commissioner-te hmang tangkai thin zawk tura a duhthu a sawilang bawk a ni.

Minister Pu R.Romawia enkawl Art & Culture department chuan hmasawnna tur engemawzah an duan te sawihoin, chung zinga ‘State Policy on Culture’ tih an duan thar chu kalpui a pawimawh thu an sawi a. He policy-ah hian Mizo hnam nunphung leh hnamziate chak zawka humhalh leh pholan anih theih dan turte an sawi a. Department-in manpower a indaih lohnate siam that tul an tih thute an sawiho bawk a ni.

Land Revenue & Settlement department hmachhawp an sawihoah Chief Minister chuan land mapping tha tak neih tula a hriat thu a sawi a. Stamp & Registration ah ram kan neihte register vek a tulziate sawihoin, hei hian revenue lamah pawh kan ziaawm phah ngei a beiseiawm thu sawiho a ni a. Department hotute hian ram buai avanga court case an neih tam thu sawiin, hei hian indaih lohna te, tha leh hun a heh dante tarlangin department tan a ziaawm thei beiseiin ‘legal & dispute cell’ din mai nise an ti a. Land record tih chak a tul thute an sawiho bawk a ni.

Heng department-te bakah hian Chief Minister hian Parliamentary Affairs chungchang pawh Law Secretary nen an sawi bawk a ni.

Department-te hi a changtu Minister Pu R.Romawia’n a hoin, Secretary te an tel kim bawk a ni.

Attachment

  • Loading attachment...