Pu John Rotluangliana Deputy Speaker, Mizoram chuan vawiin khan Chhim Veng YMA Hall, Mamit-ah SSA Mission hnuaia Computer Aided Learning Programme atangin Mamit District chhunga Middle School 59 te hnenah Computer set a sem.
He hun Pu P.C Lalthianghlima DPC SSA Mission Mamit kaihhruaiah thusawiin khuallian Deputy Speaker chuan sawiselna tam tak karah pawh ram hmasawnna tur thilte chu sawrkar in a sem chhunzawm zel a ni tiin tuna Computer semte pawh hi games khelh nana hmang mai mai lova naupangten tunlai thiamna tluantling an neih theih nana hmang tangkai turin a chah a, mi harsa leh chhumchhiate dinchhuahna tura sawrkar flagship programme NLUP pawh hi a hlawhtlinna chu a dawngtute-ah a in nghat a ni a ti bawk. Khuallian chuan kawngtin renga hmasawnna kan chan lai hian mipuite hian neitu thinlung hi kan thansan ta nia hria-in hemi kawngah hian kan in ngaihtuah a hun ta hle a ni a ti bawk.
Zirtirtute pawimawhna tarlangin zirtirtute zirtirna hi naupangten an pawm nghet tlat avangin an zirtirna-ah an fimkhur a tul a, hlawhtlinna an chan pawhin an zirtirtute tan hlimna a thlen thin a ni a ti.
Khuallian chuan sawrkar chu mipuite tana ding anih thu sawiin sawrkar pawhin mipui tha, mipui rinawm a mamawh ve bawk a ni tiin chutiang mi ni tur chuan mitinte in buatsaih turin a sawm a ni.
He Computer semna inkhawmah hian Mamit District chhunga Middle School hrang hrang atanga Computer dawngtute bakah khawpui chhunga zirtirtute mi tha hnem tak an tel a ni.
