Kawlphetha 210 MW hnukchhuak thei tur Tuivai Hydro Electric Project siam tanna tura sawrkar laipui in July 23rd , 2013 a rem tih tak avangin vawiin khan Parliamentary Secretary (P&E) Pu. Lal Thanzara chuan tualchhung chanchinbu mite Chief Minister Conference Hallah lawmna thingpui a in pui.
Pu Lal Thanzara chuan Mizoram mamawh pui ber pakhat kawlphetha tam zawk siam chhuak tur a sawrkarin theihtawp a a hma lak dan tlangpui a sawi a. Tuivai Hydro Electric Project hi Public Private Partnership (PPP) hmanga thawh tur niin, sum sen tul zawng zawng chu a thawktu company leh sawrkar laipui in a tum tur Viability Gap funding an tih ram pum huapa a vawikhat na tur a ni ti in, hetiang hamthatna Mizoramin a zar a zo theih na chhan chu Chief Minister Pu Lal Thanhawla tuipuina leh hmalakna liau liau a ni, a ti. Tualchhung thuthar theh darh tu te chu hetiang sawrkar hmalakna te hi a chin chhuak a chhui a dik taka mipui hnen a puang zar turin a sawm a ni.
Mizoram sawrkar aiawh a bawhzuitu ber pakhat Principal Adviser T.P. Khaind pawhin Tuivai Hydro Electric Project hi Mizoram tana bungthar leh chhinchhiah tlak mipui mimir sumpai dawmkangtu tangkai tak anih tur thu a sawi a.
He Project tobul leh an chhawpchhuah chhoh dan te hrilhfiah in Engineer in Chief Pu C.L. Thangliana chuan Tuivai tuikhuah turin ram 1600 hectare a chim tur thu te, a huam chinah in dinglai a awm loh dan te sawiin chu chuan hmalakna a tih awlsam a beisei thu te a sawi a. Viability Gap Funding hmu thei state hmasa ber kan ni chu vanneihthlak a tih zia sawiin, North East State ah PPP hmanga Project liantham thawhna hmasa ber anih tur thu a sawi tel bawk. Sawrkar laipui Finance Ministry hnuaia Empowered Institution Meeting vawi 47 na chuan he project kalpui hi a remtih tak dan bakah, he Project kal dan tur leh nih dan phung tur chipchiar takin chanchinbu mi te a hrilhfiah a ni.
Vawiin lawmna thingpui in ho na ah hian media mi te chuan he Project chungchanga an thu hriat duh lai te zawtin, in pawh taka inkawm ho na hun hman a ni.
