Election Commission of India-in Lunglei leh Serchhip District Electoral Roll Observer tura a ruat Pu Zothankhuma, IAS chuan vawiin khan Lunglei Circuit House Conference Hall-ah Lunglei DC & DEO Pu Ashish Madhaorao More, IAS kaihhruaina hnuaiah Election officials bakah political party leh NGO hrang hrang aiawhte kokhawmin Electoral Roll Summary Revision kalpui mek chungchang sawihona a neihpui a ni.

Electoral Roll Observer Pu Zothankhuma chuan rampumah kumtin tih thin Electoral Roll Revision chu tih a hun leh tawh a, kumina Revision hi Mizoram tana a pawimawh zualna chu nakkum January/February thlaa Village Council inthlanna neih tur hi a ni a, chuvangin fimkhur leh uluk taka kalpui a tul thu a sawi a. Final Electoral Roll thar hi 5th January 2015-ah tarchhuah a ni dawn a, hei hi VC Electoral Roll inghahna tur ber a ni bawk dawn a ni, a ti. Hmun khat bakah in-enrol theih a nih loh avangin mi tupawhin Electoral Roll-a hming thunluh rawn dil an awm chu uluk taka an chanchin finfiah a pawimawh hle a, hemi atan hian ERO/AERO ten Hearing an nei laiin NGO leh political party aiawhte an tel ve ngei chu duhthusam a ni, a ti.

Lunglei DC & DEO ni bawk Pu Ashish Madhaorao More pawhin Lunglei District chhunga AERO/ERO/BLO te tan training an neih zawh tawh thu leh Electoral Roll Revision hna pawh kalpui tan a nih tawh thu te a tarlang a. Lunglei District chu ramdang pahnih inkara awm a nih avangin India khua leh tui dik tak ni lo thun palh lakah fimkhur a tul leh zual a ni, a ti a. Lunglei District huamchhungah chuan Electoral Roll-a thunluh tur kum 18 tling tharte zaa 100% thunluh ngei tumin beihpui thlak a ni ang, a ti bawk. Electoral Roll Observer Pu Zothankhuma chuan November ni 10-ah Lunglei a rawn kal leh tur thu sawiin chumi hunah chuan Hearing kimchang tak neih a tum thu leh chumi hunah pawh officials bakah political party leh NGO aiawhte chu kim taka tel ngei turin a chah nghal a ni.