Tukin zing dar 7:00 AM khan N. Saiha Vety kawn ah “ Faina hapta” hawnna Programme hman a ni. He programme Pu B. Lalchhawntluanga, SDO(S), Saiha  kaihruai-ah hian Saiha District Bawrhsap leh District Level Clinliness Week Committee Chairman nibawk Pu Alok Swarup, IAS  chuan thu sawiin, Faina hi kan mimal theuh atanga kan tan a ngai a, mimal kan fai chuan chhungkua a ti fai a, chhungkua a lo fai chuan khawtlang leh ram pawh a fai mai dawn a ni a ti a, faina hian mahni chauh ni lovin thenawmte pawhin min tawmpui ve tur a ni a ti bawk a, mahni fai a thenawmte tana hnawksak kan nih si chuan kan Bible thu “ I vengte hmangaih rawh “ tih a thelh daih a ni a ti. He “ Faina Hapta” hawnna Programme-ah hian Pu T. Chatlua, President, MTP Head Quarters chuan thu sawina nei in Faina hi Pathian anna bul a nia, tupawhin Pathian an kan duh chuan kan Fai hmasak a ngai a ni a ti. Pu Dr. HT. Phosa, CMO, Saiha pawhin thu sawiin Saiha mipuite faina leh hriselna lam-ah hma kan sawn tawh hle a ni tiin hrisel tur chuan kan Fai hmasak a ngai a, ei leh in kawnga tun aia nasa zawka tan kan lak a tul a ni a ti bawk.

He “Faina hapta” hawnna Programme-ah hian Official te, Tlawmngai Pawl hrang hrang te, Vengchhung hruaitu te, School Naupang te leh Chanchinthar thehdarhtute an tel kim hle a ni. Faina Hapta denchhan hian vawiin ah NGOs hrang hrang te leh vengtin V.C. te tangkawpin vengchhung tihfai hna an thawk nghal dawn a ni.