Kolasib D.C. Pu R. Lalramnghaka chuan tukin khan Kolasib Venglai-a Mahatma Gandhi lim awmna hmunah Faina Hapta, 2013 a hawng.

Hawnna thu sawiin Pu Ramnghaka chuan, Faina hapta kan hman thin hi kan ramin kan sawtpui hle a. Faina hapta chhunga intihfai mai hi a thiltum a ni lo tih erawh hria ila,. Faina pawimawhzia leh a tulzia kan inzirtirna hun pawimawh tak a ni a, kan thlen chin theuh atanga hmasawn i tum ang u, a ti. Mahatma Gandhi-a kha zalenna sualtu chauh a ni lova. Kawng tinrengah thingtlang kilkhawr ber thlenga tih hmasawn a, mahni inrelbawl theia awm tir tum a ni a. A piancham lawmna nipah fawma Faina Hapta kan hmang thin hi a inhmeh hle a ni, a ti a. Pu Lalramnghaka chuan, faina kawngah hian sawrkar kut nghak lova mitin ten kan khawtlang fai nan leh kan lo hrisel theih nana ke kan pen zel hi kan tihtur a ni, a ti a ni. Cleanliness is next to Godliness tia kan sawi fo hi Pathian a hmasa bera kan ngaihsak dawttu-ah Faina hi kan ngai pawimawh ber tur a ni, tihna a ni a. Taksa hrisel lo a hlim theihloh avangin hrisel tur chuan kan fai a tul a. Kan thalai leh naupang zawk ten faina hi thanlen pui sela, kawng sir behchhana zunram thiar mai mai tehi a hrisel lo hle a ni tih kan hriat a hun a ni, a ti bawk.

Pu Andrew Lalhruaia, DUDO, UD & PA chuan Hapta hawnna inkhawm hi kaihruaiin Week hman tur chungchang leh faina chungchanga Deptt. hmalakna te a sawi a. Khawtlanga tlawmngai pawl hrang hrangte nena thawh hona tha tak an neih thin avanga a lawmthu pawh a sawi a ni. Dr. Lalhlimpuia Sailo, Chief Medical Officer chuan hriselna kawnga Faina pawimawhzia a sawi bawk a ni.

Faina Hapta hawnna inkhawm neih zawh hian Venglai atanga DC Bangla thleng kea kalin DC leh mipui ten khawlaia bawlhhlawh te chharin hnatlang an nei nghal a ni.