Vawiin khan Chanmari West Indoor Stadium-ah MUP Chanmari West Unit-te chuan Upate Ni an hmang a, Pu Lal Thanzara, Bialtu MLA leh Parliamentary Secretary ni bawk chuan a hman pui.

Pu Lal Thanzara chuan MUP Chanmari West Unit member-te chu ‘Upate Ni’ chibai bukin, vengchhung leh khawtlang tinuamtu an nih thu a sawi a; Upate ngaihsak leh chhawmdawlna chang hriat chu naupang zawkte bat a nih thu sawiin, an vengchhunga tlawmngai pawl dangte nen thawhhona leh inpawhna tha tak an nei chu fakawm a tih thu a sawi bawk. Khawvel finna leh changkannain min chiah hneh hle mah se, Upate chu inkiltawih mai lo tura fuihin, “Thluak fing tawhte leh tawnhriat ngah tawhte kaihhruaina leh thurawn te thalaite hian kan mamawh hle a, in tellovin kan kal theilo a ni,” a ti a; Sorkar pawhin Upate a ngaih pawimawh hle thu sawiin, an hamthatna tur leh an mamawhte phuhrukna turin hma lak mek zel a nih thu a sawi bawk. Upate chu Pathian remruatna fel tak hnuaia innghat tura chahin, hmalam beiseina eng tak siamsakin an awm a ni tih hriatna nena an hun hmang turin a chah bawk. Khuallian hian MUP Chanmari West Unit-a kum 10 Office Bearer lo ni tawh mi panga te hnenah chawimawina thuziak a hlan bawk a ni.

He hun hi Pu K. Lalramzauva, President MUP Chanmari West Unit chuan kaihruaiin, Finance Report leh Secretary Report-te ngaihthlak a nih hnuah, kumin chhunga an member chatuan ram pan ta, mi pakua te sunna hun an hmang bawk. Vengchhunga tlawmngai pawl hrang hrang- MHIP leh YMA bakah Local Council aiawhten thusawina hun an hmang a, MUP member kum 80 tling thar mi pariat te hnenah chawimawina thuziak hlan an ni bawk. He inkhawm hi Pu B. Savunga chuan lawmthu sawiin a khar a, chawhnu lamah vengchhung tlawmngai pawl dangte nen infiamna hrang hrang hmanga intihhlimna hun an hmang bawk.

MUP Chanmari West Unit-ah hian member mipa 155 leh hmeichhia 230, an vaiin mi 385 an awm meka, an zinga mi 60-te hi kum 80 leh a chunglam an ni.