Vawiin khan Governor Pu Vakkom Purushothaman chuan Chanmari YMA Hall-ah Kerala Cultural Forum, Aizawl buatsaihin Kerala State Kut pawimawh ber ‘Onam’ a hmanpui a, khawnvar halin he Kut lawmna hi a hawng a ni.

Governor chuan, Kerala mi (Malayalees)-te chu mi taima leh hna thiam an nih thu sawiin, eizawnna hna avangin khawvel hmun hrang hrangah an inzar pharh mek a ni, a ti a. India ram hmun hrang hrangah leh Mizoramah ngei pawh, dinhmun pawimawh tak tak chelhtu an nih thu a sawi a, “Hei hian Kerala mite chu an hnaa inpe zo leh anmahni ruaitute tana chhawrtlak tak an ni tih a lantir a ni,” a ti bawk.  An hnathawhna hmun theuhah Kerala state tana mi chhuanawm ni theuh tura chahin, Onam Kut hlim taka hmang turin duhsakna a hlan bawk.

He hunah hian Kerala Cultural Forum, Aizawl Secretary, C.N.S. Nair chuan inlawmna thu sawiin, A.R.V. Pillai, Kerala Cultural Forum President hnen atangin thusawi ngaihthlak a ni bawk. Mizorama Malayalees awmte zinga zirna leh eizawnna kawnga hlawhtlinna changte hnenah Governor hian chawimawina thuziak a hlan a, hemi Kut puala zirlaite tana Drawing, Recitation leh Elocution-a intihsiakna lawmmante chu Governor nupui, Dr. Lily Purushothaman chuan a hlan bawk.

Onam hi Buhseng Kut niin, thawnthuah chuan Lal Mahabali thlarauin Kerala a tlawh a, hemi lawmnan hian Onam hi hman a ni ta a ni. Aizawlah pawh kumtin Kerala Cultural Forum bultumin Onam Kut lawmna hi neih thin a ni.