Chief Minister Pu Lal Thanhawla chuan nimin khan Kawrthaha PHE office Junior Engineer ina enkawl thin, Sub Division Officer levela hlankai thar, Kawrthah WATSAN Sub Division Office chu a hawng.

Hawnna inkhawm Middle School I tuala buatsaihah Chief Minister chuan sorkarin hmasawnna a kalpuinaah Kawrthah mipui ten lawmnachang an hria chu Pathian duh zawng a ni tiin, malsawmna tam zawk an dawn chhoh zel a beiseipui thu a sawi a. Mizoram khua leh tuite chu ram leilung fate vek kan ni a, ram chhiat leh thatah mawh kan phur vek a, a chhelai siam tha tura koh vek kan ni a ti. Pu Hawla chuan khawtlang hruaitute atangin Kawrthah mipuite chu rilru zau tak pu an nih thu leh mi ngelnghet tak an ni tih a lang a, hetiang hi ram hmasawnna ina a mamawh a ni a ti. Chief Minister chuan an bialtu chu hun lokal zel tura ram hruaitu pawimawh tak la ni chho zel tur anih thu sawiin, mi ngelnghet an nih angin hmalam hun lokal tur thlir thiam turin a chah a ni.

Chief Minister chuan Kawrthah biala hnam te zawka inngaite an enkawl dan chu fakawm tiin lawmthu a sawi a. Kum 2008a inthlan dawna Zoram mipui ten tawngtaia  rorelna tha, rorelna fel leh rorelna dik awm tura Pathian hnena an dil chu an tawngtai chhannaa a sorkar kaihhruai chuan  chumi tihlawhtling turin huaisen taka lepse ngama an kal chhoh thu a sawi a. Bang loa an tawngtaipui avangtein mualpho loin tluang takin tun hi an thleng thei a, a lawmawm tak zet a ni a ti a. Diklo leh fello te chu danin a suthlu mai a ni a tiin, eirukan lakah an fihlim avangin corruption hi an do ngam a ni a ti.  Sorkar hnathawk hlawha lungawilo te hi midangte hlawhah an lungawilo zawk a ni a, an nawrhnate hi mipui tan phurrit thlentu a ni a, ringtu ten kan tih hauh loh tur a ni a ti. Chief Minister chuan Mizo hnam hi hnam intodelh, hnam intluktlang leh hnam zahawma siam kan tum a, a kawng pawh kan hria, chumi tur chuan kan kal mek a ni a ti. 

Bialtu MLA Pu Lalrinmawia Ralte, Parliamentary Secretary chuan Sorkar chu hnam hnufualte ngaihsaktu a ni tiin, Kawrthah bial chu bial vannei, power supplyah phei chuan a hmu tha ber kan ni hial ang a ti a. A bial chhunga hmasawnna hrang hrang hmalaknate sawiin, cheng vaibelchhe zahnih dawn hu hmasawn nan hman anih tawh thu a tarlang a ni.

Hawnna inkhawm hi Pu R.Lalfanliana, Engineer-in-Chief, PHE Departmentin a kaihruai a ni.