NLUP Implementing Board ina NLUP ti tha khua thlang tura selection committee a dinin, kum 2013 chhunga ti tha a thlan chhuah te zinga a pahnihna dawngtu Zamuang khua chuan nimin khan an lawmman dawn lawmna community hallah an nei a, Chief Minister Pu Lal Thanhawla chuan a hmanpui. Lawmman dawn hriatrengna lungphun BNRGSK buildinga phun chu Chief Minister hian a hawng hmasa a ni.

Chief Minister Pu Lal Thanhawla chuan mirethei leh chanhai, kuthnathawktu leh chhumchhia ten  eizawnna nghet an neih theihna tura bul an tanna tur, rahbi tuksak nan tanpuina NLUP dawngtu zawng zawng, mimal leh khua te chu mithiam ten an vil reng a ni a ti a. Zamuang khua in Zoram puma NLUP ti tha pahnihna an dawng thei chu khaw tangrual, hlawhtling tak tak tura hnathawk an ni tih a chiang a, ka lawmpui tak zet  a, hetiang lawmna ni sawinaah in hmang hi a lawmawm hle a ni a ti.

Chief Minister chuan retheite thleng phak budget hi ala awm ngailo a, tunah he sorkar hian alo nei ta a, a lawmawm tak zet a ni a ti a. Eng hna pawh thawk ila kan awmna apiang hi Pathianin A rawngbawl tura min dahna a ni a, rinawmna, taimakna leh dikna nen tui takin kan thawk mai tur a ni a ti a. Chutiang chuan Zamuang khua hian malsawm tlak in hna in thawk tih a tilang a ni a ti a. NLUP hi sorkar hnathawk leh mi hausate tan a nilo a, mirethei, kuthnathawktu, loneimi, pachhia leh chhumchhiate tan a ni a. Chuvangin a hlawhtlinna chu a dawngtu kutah a awm a, rinawmna, tumruhna, taimakna leh dikna nen an kalpui tur a ni a ti. An hlawhtlinpui ngeina turin NLUP Implementing Board hotu ten rim takin hna an thawk a, indaihlo chungin theihpatawp an chhuah reng a ni tih mipui lamin an hriat ve a tul a ni tiin, Pu Hawla chuan officialte thawhrimna ringawt atang pawh hian a dawngtute hian hlawhtlin tak tak an tum tur a ni a ti.

Zamuang khua in tui tlan tur tha an mamawh thu an thlenah Chief Minister chuan kum 2013-2014 chhunga State Plan Assistance atangin Rs.204 lakhs dah anih thu leh hei hi Planning Commissionah DPR theluh tawh anih thu a sawi a. NLUP atang pawhin cheng nuai sawmsarih pek anih thu a sawi. Pu Hawla chuan kuhva sawngbawlna tur bun sak an nih tur thu a sawi bawk a ni.

Zamuang khua ah hian mihring 1721 an awm mek a, in 293 awmin, chhungkua 271 an awm bawk a ni. An eizawnna lian ber chu kuhva chin a ni a, chhungkaw 251 velin chingin kum khat chhungin Rs.196 lakhs hu an thar thin tih VCP Zarzoliana chuan a sawi bawk a ni.

Community Hall-a lawmna inkhawm hi VCP Vice President Pu C.Lalnuntluanga’n a kaihruai a ni.

Chief Minister hi a nupui Pi Lal Riliani bakah Pu Lalrinmawia Ralte, Bialtu MLA in an tawiawm a ni.