Vawiin khan I&PR Conference Hall-ah Centre for Peace & Development (CPD) leh Panchayat Mahila Shakti Abhayan (PAMSA) huaihawtin politics khawvela hmeichhiate tel ve dan chungchang inrawnkhawmna leh sawihona hun nileng awh hman a ni a. UD&PA Minister Pu Zodintluanga’n he hun hi hmanpuiin hmeichhiate tanlakna tur hrang hrangah fuihna thu a sawi a ni.

Inrawnkhawmna hun hi Pi Zopari, Vice-President, PAMSA-in a kaihruai a. Minister chuan politics khawvelah hmeichhiate tan seat hauhsak ni kher lo mahse mipa te ang bawka taima leh hratkhawkheng, mahni inpe a, hrehawm tuar huama an beih phawt chuan dinchhuah theih lohna tur a awm bik lo a ni, a ti. Entirna chiang tak tarlangin Pu Zodintluanga chuan AMC inthlannaah khan hmeichhe tana seat hauh 6 te kha tuna thlan tlin tak te hian an humhim zel chuan inthlan leh hunah seat 6 dang hmun hrana pek leh an nih dawn bawk avangin hmeichhiate hian seat 12 emaw seat 18 emaw lai an chang pha thei mai dawn a ni tiin politics-a dinhmun chu a suala sual chhuah ngai a ni, a ti. Minister chuan hmeichhiate hi chhungkuaah pawh dinhmun pawimawh, chhungkaw khaidingtu ber an nih fo avangin khawtlang leh kohhranah pawh mi pawimawh an ni a, an hmalaknate avangin khawtlang leh kohhran pawhin dinhmun tha zawk a chuangkai thin a ni, a ti bawk.

Inrawnkhawmna hun chawhma lamah hian PAMSA President Pi Zothankimi chuan thukamkeuna hun a hmang a; inrawnkhawmna thupui Dr. Lalneihzovi, Asst. Professor, MZU-in a chang a. Ram rorelnaa hmeichhiate dinhmun sawihawnna chu Angela Ch. Ralte, Secretary, CPD-in a hmang thung. Chawhnu lamah sawihona, zawhna leh chhanna hun kalkhawm ten an hmang a ni.