Vawiin khan Kolasib Diakkawn-a Brig. C. Vankunga Shopping Centre-ah  Kolasib Forest Division, Environment and Forest Department leh Kohhran Hruaitute Committee, Kolasib buatsaihin ‘Thilsiam dangte humhalh chungchang Seminar’ neih a ni a. Hetah hian Kolasib khaw chhunga Kohhran zawng zawng atanga rawngbawltu ruat bik mi 150 vel an tel a ni.

Seminar hi session hnihah thenin a session khatna chu Pu Lalthlamuana Pachuau, DFO, Kolasib- in a kaihruai a. Thu hma sawiin Pu Muana chuan Nungcha te hi Pathianin duh taka a siam te an ni a. Chuvangin anmahni venhimna leh enkawlna chungchangah ngilneihna kan lantir a, duat taka kan enkawl hi kan tihtur a ni, a ti a. Seminar chhimtu kohhran hrang hrang aiawhte chu mithiam te paper buatsaih tangkai taka hmang zui turin a ngen a ni.

Chawhnu session chu Pastor C. Lalrintluanga, Chairman, Kohhran Hruaitute Committee, Kolasib in a kaihruai a. Seminar chhung hian  thupui thlan chhuah hrang hrang mithiam te sawi ngaihthlak a ni a. Zawhna leh chhanna hun hman a ni bawk.

Ramngaw leh nungcha rem zelin nghawng a neihte tih thupui hmangin Pu Lalduhthlana,DFO, (Protection) chuan thu a sawi a. Mihring leh thilsiam dangte inlaichinna tih Pu H.Lalhmunsiama, V.President, ASEP in a sawi a, Ramngaw leh Nungcha humhalh pawimawhna leh chumi kawnga mipui te mawhphurhna tih chu Pu Laltlanhlua Zathang, Field Director, Dampa Tiger Reserve chuan a sawi bawk. Thil siam dangte  chunga ringtute mawhphurhna tih Pastor H. Lallianzara hnen atangin ngaihthlak a ni bawk a ni.