Indian Republic Day vawi-69 na chu vawiin chawhma dar 10:30AM khan District Playground Siaha vaihpi-ah ropui leh urhsun taka lawm a ni.

He Ni lawmna-ah hian Smt. Harleen Kaur IAS, Deputy Commissioner, Siaha District  chu khuallian a ni. Zing dar 10:30-ah Hnampuanzar pawtpharh in Parade Contingents ten Hnampuanzar Chibai an buk chu a chhanglet a.. Khuallian chuan thu sawiin, India ramin zalenna a neih hnuin mahni ngeia Danpui te siam a, mipui rorelna Sawrkar a lo din cham Indian Republic Day Vawi-69 na hlim leh lawm taka hmang theuh tur leh he Ni denchhen hian India khua leh tui zawng zawng te India ram hmasawnna tur leh inpumkhatna tha zawkte kan lo neih theih nan mahni inhlan thar leh turin kal khawmte chu a chah bawk a ni. India ramin  Danpui felfai tak hnuaiah chak taka  Ram hmasawnna a kalpui mek lai hian keini Siaha District, India hmarchhak kilkhawr taka awmte pawh hian hmasawnna nasa tak kan nei chho ve mek a ni tiin, hetiang hmasawnna kalchho mek hi a tithuanawptu ni lovin  hmasawnna atana theihtawp chhuah theuh turin Siaha District mipuite chu tangrual turin a fuih bawk a ni.

Sawrkar hmalak tawhna hrang hrang leh Siaha District tana a hmachhawp mek te tarlangin, inkalpawhna kawngpui tha leh tlo siam tura hmalak mek :Tipa-Zyhno-Laki-Lopu-Phura kawng leh Kaochao-New Laty-Phura kawngpui sial mekte ngawrh taka thawh mek a ni a, kawng sialna tura mimal ram tihchhiat ngai tura zangnadawmna te pawh chak taka bawhzui zel niin, atam zawkte chu pek an ni tawh a ni. He kawngpui sial mek te hi zawhfel a nih hnu chuan kan ram hausakna  inphumru chu haichhuahin a awm dawn a ni, a ti. Hetianga kan sawrkarina hmasawnna min chhawpchhuah sak lai hian taima tak leh rinawm taka thawk a, malsawm tlak nih theuh turin mipuite chu a chah hlawm a. Siaha District mipuite tui lama harsatna kan tawk thin chu sawrkar chuan hriain Augmentation of SGWSS hmangin Titlao tui chu Siaha khawpuiah pump chhuah tawh a ni.  kan khawpui a lo fai a;  a lo thianghlim zawk nan Swachh Bharat Mission leh DC’s Office bakah NGOs’ te tangkawp chuan theihtawpa hmalak mek a ni. Kan District Nausen leh Nau chunga Nu thihna pawh a tla hniam zel a, hemi kawngah hian NGO hrang hrang te, a bik takin Mara Chano Py (M.CH.P) te leh Medical Department te hmalakna chu a chhuanawm hle a ni a ti bawk. Prime Minister Award for Excellence in Public Administration Siaha District in kan dawn chu Siaha District mipui te leh Sawrkar hnathawk te thawhhona thatzia ti langtu a ni mai piahlamah, kuthnathawktute thawhrimna pawh a pholang chiang hle a ni, a ti a. PM Award in a ken tel tangkafai  hmanga Tisi khuaa Sub-centre sak a ni thu pawh a tarlang bawk.

He Ni lawmna-ah hian Parade Contingents 14 awmin, School Contingent -9 leh Uniform Contingent -5 te an ni a.  Uniform Contingent te zinga pakhatna chu NCC Bon Bosco School te niin, pahnihna – 2Bn. MAP leh pathumna- Mizoram Police te an ni a. School Contingent te zinga lawmman la te chu: 1st  Prize- Hill Gate School, 2nd  Prize -GHSS, Siaha leh 3rd Prize -Adventist English School te an ni.

He Ni lawmna pual hian Siaha District chhunga Department hrang hrang ten Tableu Show ropui tak an entir a, a lawmman dawngtute chu : 1st Prize- Art & Culture, MADC, 2nd Prize-AH& VETY dept leh 3^rd Prize-Forest Dept. MADC te an ni. Vawiin Republic Day lawmna-ah hian Dr.Ambedkar National Merit Award Scheme dawngtu Lalrinchhana s/o Lalramthara (L) hnenah Chawimawina Thuziak leh tangkafai Rs.40,000/- pek nghal a ni.Lalrinchhana hi Nikum(2017) HSLC Board Examination-ah khan Mizoram pumpuia 4 na niin, Subject zawng zawng-ah letter mark a hmu vek a ni.

Vawiin Republic Day-2018 pual hian Basket Ball leh Shooting-ah te intihsiakna buatsaih a ni bawk. Vawiin Republic Day,2018 puala lawmman hrang hrang te hi Khuallian  Smt. Harleen Kaur IAS leh Pu N.Zakhai CEM, MADC ten an sem  a ni.

Vawiin Republic Day, 2018 lawmnaah hian Siaha a awm 1st BN Assam Rifles ten mipui en theih turin an ralthuam chi hrang chrangte an pho chhuak bawk a ni