Naktuk January ni 27, 2018 hian Lunglei District Mizoram Journalist Association member 10- te chu Lunglei District IPRO Pi C. Lalremruati kaihhruaina hnuaiah Press Study Tour nei turin Kolkata an pan dawn. Vawiin chhun khan Lunglei I&PR Conference Hall ah inthlahna hun hman niin Lunglei District Superintendent of Police Pu Lalthafamkima Jongte, MPS chuan Press Study Tour kal tur te hi a vailiam.

Pu Lalthafamkima Jongte chuan fuihna thu sawiin India Democracy ah hian ban pathum Executive, Judiciary leh Legislative a awm a hemi bakah hian Journalist te India  Democracy a  ban pawimawh tak an ni a ti. Mipui rawngbawltu in nih angin mipuite hriat tur leh kan State tana entawn tur tha a tam theih ang ber rawn hawn turin in finna leh thiamna te hmang tangkai turin a chah a ni.

Lunglei District Mizoram Journalist Association President Pu Lianchama Chhangte pawhin thu sawiin sorkar hmalakna in Kolkata an tlawh thei dawn avangin lawmthu a sawi a. Deputy Commissioner, Lunglei, I&PR Department leh SP, Lunglei ten an zinna tura hma an laksak avangin MJA Lunglei aiawhin lawmthu a sawi a ni.

Pi C. Lalremruati chuan Press Study Tour program tlangpui sawifiahna hun a hmang a. Study tour-a tel te hian Kolkata leh a chhehvel a hmun pawimawh hrang hrang an tlawh dawn bakah Kolkata Press Club an tlawh dawn a. Press Club President Pu Snehasis Sur leh a thawhpui Executive Committee member leh Senior Journalist te nen inkawmhona hun an hmang ang. India rama newspaper chhuak hmasa ber Bengal Gazette din champha lawman Seminar ah an tel bawk ang. Tin, Kolkata Municipal Corporation hmunpui an tlawh dawn bawk a ni.

Attachment

  • Loading attachment...