Vawiin hian ram chhung hmun dangte rualin Serchhip a Republic Day vawi 68-na chu ropui taka lawm  ani a. A lawmna pui ber chu Khawtetlang Playground ah hman niin Bawrhsap Pi Sangchhin Chinzah chu khuallian a ni. 

Zing ni chhuah rualin Serchhip a sawrkar leh mimal in hrang hrangah India hnam puanzar zar a ni a, zing dar 7:00 a.m ah he ni puala thilpek District Hospital Poor Fund, Unity Orphanage Home, Shalom Special School, Zoar Deprived Children Home, Old Age Home, Adult Rehabilitation Centre leh District Jail ah te hlan an ni. Chawhma dar 11: 00 a.m ah a lawmna pui ber hi Khawtetlang Playground ah hman a ni a, khuallian Pi Sangchhin Chinzah chuan hnam puanzar pawtpharh in, hnam puanzar chibai buktu Parade Contingent te chibukna a chhanglet bawk. 

He hunah hian Khuallian chuan thusawiin, India mipuite duhthusam, Sovereign, Socialist, Secular Democratic Republic ram ni tura India danpui (Constitution) lo duang chhuaktute zahna chibai a buk a. Remna leh muanna a awm theih nana beitu zawng zawngte chungah lawmthu sawiin, an thawhrimna zarah Mizoram leh Serchhip District ngei pawhin chak taka hma a sawn zel thu a sawi. Pi Sangchhin Chinzah hian tun hnai maia Serchhip District chhunga hmasawnna hnathawh tlangpui a tarlang nghal a. PMGSY sum hmanga Chhingchhip- Thentlang, Hmuntha-Khawbel, Chhingchhip- Hualtu, Chhingchhip-Hmuntha leh E. Lungdar- Sailulak kawngte reiloteah zawh theih mai beisei an ni tawh thu a sawi a. PMGSY atang veka Serchhip – Hriangtlang kawng leh Chekawn – Lungchhuan inkar kawng pawh laih tura ruahmanna siam mek an nih thute, Central Road Fund sum hmanga Tuichang lei (Bridge) meter 68 a sei chu dawh tura hnathawh mek a nih thute a tarlang.  Miretheite dawmkan nana Mizoram sawrkar hmalakna pawimawh NLUP leh NEDP hmanga District chhunga hnathawh hrang hrangte, Horticulture, Sericulture, AH & Vety, Fisheries, Industries, PHE leh Power & Electricity lama hnathawh lian leh langsar te, mipuite himna leh hriselna atana Police Department leh Health Department lam atanga hnathawh hrang hrangte, District Hospital tihchangtlun nana NEDP sum atanga hmanraw thar tam tak lei thar a nih thu leh Doctor Specialist pawh a thar pahnih sawrkarin a rawn dah thute a tarlang bawk. 

Rural Development lama sawrkar hmalakna pawh sawiin Khuallian hian, kum 2017 chhungin MGNREGA hnuaiah ni 48 inhlawhna siam a nih tawh thute, Job Card nei 14,058 an awm mek thute, Urban Area lama mirethei zawkte chawikan nana UD&PA in NULM hmanga hma a lakna hrang hrang te bakah zirna lama Serchhip District in hma a sawn dante pawh a tarlang a. Heng bakah hian sawrkar hmalakna dang engemawzat sawiin heng hmalakna hrang hrang a hlawhtlin theih nana tha taka sawrkar thawhpui thin tlawmngaipawlte, khawtlang hruaitute kohhran te, chanchinbumite leh District mipuite chungah lawmthu sawiin Republic Day lawmnaa tel Parade Contingent leh School naupang te, officials te leh a chhimtu mipui zawng zawngte chungah lawmthu a sawi bawk. 

Khuallian hian Parade Contingent te hnenah lawmman a sem nghal a, lawmman latute chu hetiang hi an ni – 1-na Govt. Chhiahtlang Middle School, 2-na Marian High School Serchhip leh 3-na Govt. Chhiahtlang High School te an ni. 

Vawiina Republic Day lawmnaah hian 10^th Assam Rifles ten Ralthuam phochhuahna an nei a, Pu KL Hmingliana’n Dog show hmuhnawm tak kalkhawmte hmaah a nei bawk. A lawmna pui ber neih zawh hian Bawrhsap Pi Sangchhin Chinzah hian a chenna Bungalow ah At Home Tea Party, sawm bikte pualin a buatsaih leh bawk  ani.