India Republic Day vawi 69-na ram puma lawm a nih rualin Hnahthial-ah ropui takin zing dar 10:30 khan HBSC Ground No. I-ah lawm a ni a, Republic Day lawmna hi Pi Lalhruaitluangi, MCS SDO (C) chuan khuallian niin Hnam Puanzar a pawt pharh a, School naupang Parade Contingents 12 te Hnam Puanzar chibai buk a chhanglet nghal a ni.

Thu sawiin Pi Lalhruaitluangi chuan vawiin, kan ramin mahni a ro inrelna a neih champha vawi 68-na hmang tura lo kal zawng zawngte in zavaiin chibai ka buk a che u. Vawiin hun lawmawm tak kan Hnam Puanzar, dikna, beiseina leh hmasawnna lantirtu chibai kan bukna niah hian kan ramin mahni a ro inrelna a neihna atan a thawktu, mi huaisen te, martarte leh hruaitu ropui tak tak mual liam tawh zawng zawngte kan hre reng in zahna chibai kan buk thar leh a ni. Kan hriat theuh angin kum 200 chuang fe sap ho awpbehna hnuaia kan tan chhung khan kan ram mipuite, sakhua leh tawng hmangin min then darh a. Ram hausa leh intodelh ni thin kha kan lo hnufual hman hle a. Zalenna, thisen leh nunna tam tak seng a hruaitu hmasa ten an lo sual chhuah hi ven him a, mahni a ro inrela zalen taka kan awm a hma kan sawn zel theih nan a thawh tlan dial dial hi kan zavaia mawhphurhna a nih zia kan hriat thar leh theuh ka duh a ni a ti.
Pi Mahruaii chuan mahni a ro inrel hrang a kum 60 chuang zet kan kal hnuah kan ram hruaitu ropui tak tak te finna leh remhriatna avang te leh an inpekna avangin India ram chu khawvel hriat tham a ram ropui leh hausa kan lo ni ve ta reng mai a. India ram democracy lian ber leh mihring tam zawng a teh pawha khawvela pahnihna tling phak chhunga Mizoram ngei pawh kum 20 chhung rambuai kan nih hnuin tunah chuan remna leh muanna tluangtling neia India ram state dangte ruala ke pen ve thei turin chak takin hmasawnna kawng zawhin kan kal mek a ni. Ram leh mipui tana sorkar hmalakna tam tak zingah NLUP sem a ni a, Hnahtihal bial chhungah pawh chhungkaw engemaw zatin NLUP hi dawngin eizawnna an neih phah a ni. Hriselna kawngah theih tawpa hmalak a ni a, free clinic te neih thin a ni a, IMR leh MMR rate tihhniam te RSBY leh ISSK hnuaiah bill hrang hrang pek a nih thu te, RGGVY hnuaiah Hnahthial bial chhunga khaw 13-ah electricfication pek a nih thu te, Forest Department hnuaiah CAMPA Plantation buatsaih a nih thu te, RKVY hnuaiah Agriculture link road laih thu te, Oil Palm chin te, Darzo kai Tuipui lei dawh te, Kuthnathawktute tan KVK kaltlangin training buatsaih thin a nih thu te, Soil & Water Conservation Department hnuaiah hmalakna te, ICDS hnuaia tar leh hmeithai, rualbanlote bakah chhungkaw eizawngtu thite hnenah tanpuina pek thin a ni a, PHE department hnuaia hmalakna te a tarlang bawk. Infiamna lamah ram pum huap pawha langsar Jeje Lalpekhlua te, Issac Vanmalsawma te kan neih hi a lawmawm hle ni a ti bawk. 

SDO (C) chuan Zalenna hnuaiah India ramin chak takin hma a sawnin chumi rual chuan kan ram Mizoram ngei pawhin hmasawnna kawng zawhin a kal mek a. Chutih rualin ram zalen, hmasawn kan nih zel theih nan kan chenna in leh a vel te, lui leh a vel te enkawl thianghlim a, tur leh thil thalo hmanga khawih lo tur te in ka sawm che u a, Faina leh thianghlimna kawnga tan la zui zel tur leh bawlhhlawh pawh paih darh mai mai lova a bawmah ngei paih thin turin mipuite pawhin tihtur tam tak kan nei a ni. Kan eizawnna kawng kan thawh danah te rinawm tak leh taima taka kan thawh a tul a, ram ti chereu zawng a awm lo turte, tui thianghlim kan neih theih rengna atana thawk tur venna kawngah te pawh nasa leh zuala tan la a, kan khua leh a chhehvel hi Zoram pumah mawi taka a lan theihna tur te a thawh hi kan vaia tih tur kan chanvo a ni tih kan hriat a tul hle mai.

Zalenna remna leh muanna neih hlutzia kan hriat a, chumi avanga hmasawnna hrang hrang kan neih mek leh kan neih zel turte thlir a, sorkar hmalakna hrang hrang te hriatpui a, tawiawm tur leh khawtlang nuam leh hlim leh changkang, intodelh kan nih theihna tura sorkar finchhuah tur leh mahni theih ang tawka thawk theuh turin in zavaiin ka sawm che u a ni a ti bawk.

Parade Contingents-ah 1-na Govt. Southern High School niin 2-na Thankhuma Sailo High School leh 3-na Govt. High School Hnahthial te an ni. Khuallian hian Sub District Hospital Hnahthial-ah Rs. 2000 Republic Day pual thilpek atan a hlan bawk a ni.