Vawiin khan India Republic Day vawi 69-na chu Lawngtlai Vengpui khelmualah ropui taka lawm a ni a. Lawngtlai Bawrhsap Dr Arun T., IAS chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Chawhma dar 10:30-ah Vengpui khelmualah Khuallianin hnam puanzar pawt pharhin, parade commander Victor Zothansanga MPS, SDPO Lawngtlai kaihhruaina hnuaia hnam puanzar chibai buktu parade contingent 16 te chibai buk a chhang let nghal bawk.

Khuallian Dr Arun T. chuan Lawngtlai District mipuite chu Republic Day chibai bukin, India ram Danpui duang chhuaktu ram hruaitu hmasate zahna chibai a buk a. Lawngtlai District chhunga hmasawnna hna thawh hrang hrang tarlangin, mipuite’n an harsatna an thlen theihna tur leh MSDP leh BADP work zawng zawng geotagging tih theihna tur DC online system hawn thar a nih thu te, Lawngtlai        District chu Mizorama District Disaster Response Vehicle nei thei district pathumna a nih thu leh mipuiin chhiatna thleng an report vat theihna tur disaster toll free number 1077 pawh district chhungah hman theih reng a nih tawh thu te a sawi a. BDO Lawngtlai hma laknaa Lawngtlai Children’s Park siam chu hawn theiha peih fel a nih tawh thu te, NABARD RIPF atanga district chhung hmun hniha thing lei (wooden bridge) dawhna tur sum hmuh a nih thu leh RMSA hnuaiah Jognasury Secondary School building thar sakna tur sum pawh sanction a nih tawh thu te a sawi bawk.

Khuallian chuan Swachh Bharat Mission (Urban) hma lakna hnuaiah Lawngtlai khawpui chu January 3, 2018 khan open defecation free (ODF)-a puan a nih thu leh Swachh Bharat Mission (Gramin) hnuaiah Lawngtlai District pumpui ODF-a puang tura hma lak mek a nih thu sawiin, MGNREGA hnuaiah Lawngtlai District-ah job card holder 29170 awmin, kum 2017-18 chhungin ni 47 work days thawh tawh a ni, a ti a. NLUP line department pariat hnuaiah Lawngtlai District chhungah beneficiary 13735 an awm thu te, Lawngtlaia Health worker zirna ANM School chu October 2017 atangin zirlai 20 nen tan a nih thu te, District Hospital main building (ward) leh medical quarters sak hna thawh mek a nih thu te a sawi a. NEDP hnuaiah District Hospital tihchangtlun nan hmanraw hrang hrang - ultrasound, endoscope machine, ECG, defibrillator, etc. lei thar a nih thu leh District Hospital Lawngtlai chuan Kayakalp 2017-ah 2nd prize leh most improved award a dawn thu a sawi bawk.

District mipui himna atana Lawngtlai District police hna thawh fakin, Khuallian chuan tun hnai maia SP Pu Lalsanglura'n DGP’s Commendation Award leh 2017-18 President police medal for meritorious service a dawn thu leh Lawngtlai Police Station chu Mizorama Police Station tha 2nd position-a thlan a nih thu a sawi a. District chhung kawng awm sa tihchangtlun bakah, Pradhan Mantri Gram Sadak Yojana (PMGSY) kawng thar siamna tur hna 20 sanction hmuh belh a ni thu te, P&E hnuaiah khaw 59 electrification process kal mekin, khaw 24-ah thawh zawh a nih tawh thu te, DDUGJY hnuaiah khaw 11 eng pekna tur thawh mek leh in tin eng pekna tur SAUBHAGYA scheme launch a nih thu te a sawi bawk.

Thu a sawi zawh hian Khuallian chuan lawmman hrang hrang a sem nghal a. Republic Day parade-a school contingent-ah Downtown English School Boys chu pakhatna niin, pahnihna Jehova Jire Higher Secondary School Boys leh pathumna Govt Region Higher Secondary School Boys te an ni a. He'ng bakah hian parade endiktu (judge)-te, parade commander-te, Mizoram Police armed contingent te, SSA Pipe Band te leh parade contingent dang zawng hnenah lawmman pek a ni bawk.

Republic Day vawi 69-na puala buatsaih Volleyball Running Trophy mipaah Chandmary V/C chu pakhatna niin, hmeichhiaah Blessey V/C Sihtlangpui chu pakhatna an ni a. Best spiker mipaah Rohlupuia (Chandmary) thlan niin, hmeichhiaah Lalrinthangi (BDA) thlan a ni a; best setter mipaah Lalhlunpuia (Blessey) leh hmeichhiaah Dorothy Lalngaihsaki (Blessey) te thlan an ni.

Repubic Day Badminton Tournament 2018-ah mipa singles-ah Laphlmangaihzuala champion-in, mipa doubles-ah Vanlalchawisana leh K. Lalrotluanga te inkawp an champion a. Special category-ah Dr Andrew Khawlthangpuia leh Danny Vanlalruata te champion-in, ‘B’ doubles-ah F.Hrangena leh Lalhruaitluanga te an champion a. Government Service Officer category-ah Treasury Officer Dr K. Lalnghinglova leh Accounts Officer Pu R. Lalbiakmawia te inkawp champion-in, Bawrhsap Dr Arun T., IAS leh Election Officer Pu Lalrinawma MCS te inkawp chu pahnihna an ni.

He hunah hian Swachh Bharat Mission (Urban) cleanliness marathon race 2018 lawmman pawh sem nghal niin, pakhatna Hmangaihzuala, College Veng, pahnihna Lalmuanchhana, L-III leh pathumna Lalnunzawma, Electric Veng te an ni.

Vengpui khelmuala Republic Day lawmna hman zawh hian Chawhua Lawngtlai DC Bungalow tualah VIP At Home Tea Party hlimawm tak hman chhunzawm a ni.

Vawiin Lawngtlaia Republic Day lawmnaah hian LADC CEM Pu T. Zakunga te, Chairman Pu V.Zirsanga te, Lawngtlai SP Pu Lalsanglura te bakah, LADC-a member te, state leh district council-a officer te, NGO leh thu thar theh darhtu te, sikul naupang leh mipui thahnem tak an tel.

Attachment

  • Loading attachment...