Vawiin khan India Republic Day vawi 69-na chu Kolasib Tumpui khelmualah ropui taka lawm a ni a. Kolasib Bawrhsap Pu R Zarzosanga chu Khuallian niin he ni pawimawh hi a hmanpui.

Hemi ni hian Sawrkar Pisa leh hmun pawimawh dangah te India hnam puanzar chu zar a ni a. Chawhma dar 10.00 khan Tumpui khelmualah Khuallian in hnam puanzar pawt parhin, hnam puanzar chibai buktu parade contingent 15 te chibai buk a chhang let nghal bawk.

Khuallian Pu R Zarzosanga chuan Kolasib District mipuite chu Republic Day chibai bukin, India chuan mahni a ro a inrel theih nan Ram danpui (Constitution) a duan chu January ni 26 ,1950 khan a hman tan thu tarlangin hemi ni hi kumtin Republic Day a tana hman chhoh a nih thu a sawi bawk  ani. “Republic Day ah hian Ram tana nunna lo hlan tu te leh ram ina hma a sawn zel theih nana thiamna leh finna hlantu te hriatreng nan hmang ila, a bik takin he Republic Day ah hian India Danpui (Constitution) duanna kawnga a khaipa ber Dr. B R Ambedkar (Father of Indian Constitution) in a India ram chu rualkhai taka hma a sawn theihnana a hmalakna te pawh hriatreng a tha awm e” tiin a sawi bawk.

Khuallian chuan Kolasib khawpui chhunga Sawrkar Department hrang hrangte ina Kolasib tana an hmalakna leh an hnawthawh dan tlangpui te tarlangin, Kolasib Sport Complex Venglai-ah Rs.2268.43 lakh hmanga hmalak mek niin hna 70% thawh zawh tawh a nih thu te, Mizorama a hmasa ber ni turin bawlhhlawh sawngbawlna, Di hmuntlang, Bairabi Road ah siam mek a nih thu  te a tarlang a ni.

Kolasib District chu District hmasawn leh District muanawm a nih chhunzawm zel theihnan zirlai , nu leh pa leh thalai te chu rilru leh ngaituahna te seng a , India khua leh tui tha kan nih theih nan Dan palzam si loa zalen taka nung turin duhsakna a hlan bawk a ni.

Thu a sawi zawh hian Khuallian chuan lawmman hrang hrang a sem nghal a. Republic Day parade-ah hian Armed Contingent 1, Unarmed Contingent 4, School Contingent 10 leh SSA Pipe band 1 ten hnam puanzar chibai an buka.  Unarmed contingent-ah NCC Girls St.John’s Higher Secondary School chu pakhatna niin, Scouts & Guides St John’s Higher Secondary School chu pahnihna anni a, Ex-Servicemen League Kolasib leh NCC Boys St. John’s Higher Secondary School te chu pathumna anni a; School Contingent ah DIET Kolasib chu pakhatna niin, HT High School chu pahnihna anni a, C.Zakhuma Higher Secondary School chu pathumna anni.

Tumpui khelmuala Republic Day lawmna hman zawh hian Kolasib DC Bungalow tualah VIP At Home Tea Party hlimawm tak hman chhunzawm a ni.

Vawiin Kolasib Republic Day lawmnaah hian Kolasib khaw chhunga Sawrkar hnathawk, Zirlai Naupang, NGO, thuthar theh darhtu te leh mipui thahnem tak an kalkhawm a ni.