Vawiin chawhma dar 10:00 khan Chhangphut Field, Champhaiah District Bawrhsap Pu Vanlalngaihsaka IAS hovin India Republic Day vawi 69-na urhsun taka lawm a ni. Bawrhsap hian Republic Day lawmna hmun a thlen veleh India hnam puanzar a pawt pharh a, hemi zawh hian Republic Day Ceremonial Parade Contingent 23 (Unarmed Contingent, NCC-3  School Contingent-19 leh Ex Service Leaque-1) leh TNT Pipe Band-te chu endikin Parade Commander Assistant Sub-Inspector Joseph Lalhnehzela kaihhruai March Past parade contingent te chibai buk a chhanglet nghal a. TNT Pipe Band, Zuangtui, Aizawlin India hnam hla an rem bakah March Past neih laiin rimawi an tum bawk a ni. 

District Bawrhsap Pu Vanlalngaihsaka chuan Republic Day thuchah sawiin Champhai District mipuite duhsakna chibai a buk a. India ram Danpui, Dr. BR Ambedkara kaihhruaina hnuaia duanchhuah anih dan leh Republic ram kan lo nih theih tak dan a sawi a. 

District chhunga Sawrkarin hmasawnna hna a thawh hrang hrang te tarlangin Bawrhsap chuan Sawrkar Flagship Programme “NLUP” hnuaiah Agriculture Department in Third Phase leh Fourth Phase a kalpui  mek  thu a sawi a. National Food Security Mission (NFSM) hnuaiah ram Hectare 312 a zauah thlai chin mek anih thu a sawi a. Heng bakah hian RKVY,RAD leh ATMA hnuaiah hna thawh mek a ni, a ti a. Sawrkar policy thar NEDP hnuaiah Purun sen acres 90 ah hlawhtling taka chin a ni a, Agriculture link road Kilometre 57 laih zawh a ni tawh bawk a, kuminah pawh kawng Kilometre 60 a thui laih tura hmalak mek a nih thu leh Purun sen leh Chana acres 40 ve ve a chin mek a ni, a ti a. AH & Vety Department bikah chuan Poultry, Hill Cattle/ Mithun leh Piggery-ah te Third leh Fourth phase kalpui mek anih thu leh Hill cattle leh Mithun bik chu sem tur angte sem zawh tawh a ni a. Backyard Poultry Farming leh Sial vulhtute tan tanpuina sem chhuah anih thu a sawi a. Heng bakah hian DIC champhai hnuaiah NLUP Fourth Phase tanpuina cheng 1,00,28,400 mi 252 hnenah sem chhuah tawh a ni, a ti a. UAM hnuaiah enterprise 20 ziah luh anih thu a sawi a. Horticulture Department hmalaknain NLUP Thrird leh Fourth Phase hnuaiah GI Wire, Geo-Membrane, Neem Kasto-te sem chhuah nin Fisheries Department-in Green Revolution Scheme hnuaiah sangha dil tanpuina an pek chhuak  thu a sawi a. 

Khuallian chuan Champhai District chhunga HIV/AIDS do kawngah nasa taka hmalak zel anih thu tarlangin District AIDS Prevention & Control Unit (DAPCU) hmalakna te a sawi a. Tobacco Free Village-a Champhai Ruantlang puan anih thu leh Malaria Control Programme avanga he natna lo tlem ta te a sawi lang a. Mizoram puma Damdawi in fai inelna 2017-a District Hospital bika pathumna Champhai, CHC Category-a pakhatna hauhtu Biate-te chu chhuanawm a tih thu a sawi a. 

LAD hnuaiah 1^st Mizoram Finance Commission kaltlangin kum 2017-2018 chhungin cheng nuai 136.69 hmanga hnathawh anih thu leh kumin 2017-18 atan bika NEDP hmanga sum dawn cheng nuai 800 hmanga hnathawh tura hmalak mek a ni, a ti a. DRO Office hmalaknain Champhai District Profile tihchhuah anih thu leh Birth Certifcate 632 leh Death Certificate 62 pek chhuah anih thu a sawi a.

Kum kalta chhungin ND&PS Act, 1985 hnuaiah case 103, MLPC Act hnuaiah case 141 ziah luh anih thu leh Sapzu man atangin Rs 1,29,52,341 hmuh a ni bawk a ni, a ti a. Champhai District-a Ration Card leh Aadhaar thlunzawm kawngah za zela 72 zawh tawh anih thu a tarlang a. 

Champhai Govt. College chu National Academic & Accreditation Council-in tehfung hrang hrang hmanga an teh hnu in B++ Grade pek an nih thu leh Annual Quality Assessment Report (AQAR) thehluh anih mek thu a sawi a. Heng bakah hian Burma leh Hindi tawng zirna certificate level course-ah nikum khan hlankai a ni, a ti a. Irrigation & Water Resource Dept. hmalaknain Sesih Minor Irrigation Project zawh tawh niin kuminah hian Hmawngmuallui, Thingmaldin leh Tuilaklui MIP-te thawh leh tum a ni, a ti bawk a. 

PHE Department hmalaknain Solar Pump NE Khawdungsei, Khawkawn, Chiahpui, Mimbung leh Hrianghmun khaw tan ruahman fel anih thu a sawi a. Heng bakah hian Greater Khawzawl Water Supply Scheme peih fel tep anih tawh thu  leh Keilungliah Recreation Centre siam nan sum sanction fel anih tawh thu a sawi lang a. 20 MW Solar Park, Vankal khuaa siam tura hmalak anih thute, khawtin eng pekna tur Saubhagya Project chu hawn a lo ni tawh a ni, a ti a. PMGSY hnuaiah Khuangleng-Lianpui zawh tawh niin Khuangleng-Bungzung, Khuangthing-Thekte, Melbuk-Hruaikawn, Vapar-Murlen, Hnahlan-Tualcheng, Khuangleng-Leisenzo leh Leithum-Vangchhiate chu thawh mek anih thu a sawi a. RMSA hnuaiah Inda rama Sikul fai inelna ‘Swachh Vidhyalaya Puraskar 2016-2017’-a tel tam lawmman chu Champhai District-in  dawngin SSA hmalaknain zirlaite tan Hostel sak anih thu a sawi a. 

UD&PA hnuaiah faina kawngah tan lak niin Mizoram khawfai inelnaah Biate chu pakhatna anih thu leh heng bakah hian Khawzawl leh Khawhaite chu titha zul sawm zingah an lang tel thu a sawi a. Champhai pawh District zinga titha pathumna a ni  phak bawk a ni, a ti a. Zotlangah Sports Stadium changtlung tak hawn anih thu leh India rama khawpui fai inelna Swachh Survekshan-2018 atana nasa taka tan lak mek zel anih thu a sawi lang bawk a ni. 

Champhai District Bawrhsap chuan Champhai District- a khaw hrang hrangte chu khawnuam, leilung rem leh sik leh sa nuam tak pipu sulhnu tamna hmun anih thu  sawiin heng bakah hian District hrul maia Rihdil lo awm leh zelte chuan remchanna a siam thu a tarlang a. Heng remchanna leh vanneihna zawng zawngte hi hmang thiam thei turin District mipuite chu a sawm a. Champhai District chu la kallo leh kal tawhte tan tlawh chakawm tak ‘Destination Champhai District’ a siam thei tura tan la sauh sauh turin District mipuite chu a chah nghal bawk a ni. 

Bawrhsap hian thu a sawi zawh hian March Past Parade contingent te hnenah hian lawmman a sem nghal a, a titha zualte chu: School Contingent-ah Pakhatna - G.M. Higher Secondary School Girls Contingent; Pahnihna -Einstein Higher Secondary School Contingent; Pathumna – B.C. English Academy Girls Contingentte an ni a. Unarmed Contingent-ah Govt. GM Higher Secondary School NCC Girls Contingent chu pakhatna niin parade contingent zawng zawng hnenah participation prize sem vek a ni.

Programme zawh hnu hian Champhai Bawrhsap chuan sawmbikte tan Jericho Garden, Keifangtlanga, Champhaiah thingpui ruai a buatsaih a ni.