Vawiin khan ram chhung hmun dangte rualin Thuamluaia Mual Lunglei ah India Republic Day vawi - 69 na ropui taka lawm a ni. Pi Lalzarmawii, IAS Lunglei Deputy Commissioner chu khuallian a ni.

 Zing ni chhuah rualin Lunglei District chhunga sawrkar Pisa hrang hrangah India Hnam Puanzar zar niin a lawmna pui ber chu zing dar 10:00 a.m ah neih tan a ni.  Pi Lalzarmawii chuan hnam puanzar pawtparh in parade contingent 25 ten hnam puanzar chibai an buk chu a chhanglet bawk.

Khuallian Pi Lalzarmawii chuan Lunglei District mipuite chu Republic Day chibai bukin India khua leh tuite tan zalenna sual chhuak tu ram hruaitu hmasate zahna chibai a buk bawk a. Kan ram Dan Bu (Constitution of India)  siam leh hman tanna ni ah hian he Dan Bu ropuina leh hlutna hre chhuak thar leh theuh ila tiin Lunglei DC chuan mitin te kan dikna leh chanvo humhalh saka kan awm hi kan vannei takzet a ni, a ti.

Lunglei District chhunga hmasawnna hna thawh hrang hrang tarlangin MGNREGS hnuaiah Job Card holder mi 35,915 (Singthum Sangnga Zakua Sawm leh Panga)  an awm thu te, kum 2017-2018 chhungin mipuite hnenah inhlawhna ni 47 pek anih tawh thu te,  IAY Scheme hnuaiah  In 38 sak thar anih thu leh PMAY scheme hnuaiah In 68 sak mek a nih thu te a sawi a.  Lunglei, Tlabung leh Hnahthial khawpui te ODF-ah puan tawh niin 1st Mizoram State Finance Commission Grant to Village Councils kum 2017-2018 atan Village Council 143 te hnenah hnathawhna tur sum pek chhuah an nih thu a sawi.

Lunglei District Police ten Law & Order kenkawhna kawnga an hmalakna tlangpui tarlangin Lunglei khawpui chhung leh hmun hrang hrangah Police ten zan tin Late Night patrolling nei thin in Training leh Awareness Programme pawh ngawrh taka an kalpui mek thu a tarlang a. Superintendent of Excise & Narcotics Department pawhin tun kum chhungin chhiah Vaibelchhe Sawmriat Pasarih chuang lai a lalut a ni, a ti. High Powered Committee, Lunglei District Annual Plan Fund kum 2017 chhunga Development hna langsar zualte tarlangin SE(P&E) Quarters Lunglawn, DVO Office Lunglei building Chanmari, Medical Superintendent Office te chu ni 24.11.2017 khan Hon’ble Chief Minister of Mizoramin a hawng a ni, a ti.

Power & Electricity Department chuan RGGVY Scheme hnuaiah thingtlang khua eng pek hna khaw 82 ah thawk zo tawhin  PWD hnuaiah kawng siam, lei dawh that, building sak, thuam that leh kawng laih thar hna te kalpui mek zel a ni bawk, a ti. PHE Department, Lunglei Watsan Circle hnuaia Individual Household Latrine Lunglei Rural Development Block huam chhungah 1376 Nos. target niin, tih hlawhtlin vek a nih tawh thu khuallian chuan a tarlang bawk. District Education Office hnuaia RMSA Mission leh SSA Mission hmalakna tlangpui a tarlan bakah kum 2017 chhunga Zirtirtu chawimawi na award hmu pahnih Pi Lalmuankimi Khiangte, Headmaster Govt. P/S-I Pukpui (State Award for Teacher) leh  Pu V.Lalrinmawia, Headmaster, Govt M/S-I Pukpui (India ram pum huap National Award for Teacher) te a lawmpui takzet thu Lunglei DC chuan a sawi.

DAO leh DHO te pawhin an hnuaia scheme neih te chak taka kalpui mek zelin, District Sericulture Office hnuaiah NLUP Phase-I-IV ah chhungkua 363 hnenah tanpuina sem a ni bawk tih a sawi a. Chief Medical Officer, Lunglei District hmalakna hnuaiah PHC Building, Zobawk, Haulawng, Thingsai leh Cherhlun te chu sak zawh tawh an ni bawk. Social Welfare Department hnuaiah MHIP ten Department kaltlangin Day Care Centre pakua an enkawl mek thu te, ICDS Project pali - Lunglei, Hnahthial, Bunghmun leh Lungsen ah te Anganwadi centre zali sawm pariat (418) enkawl mek a nih thu te, Lunglei District-ah National Food Security Act, 2003 kalpui tawh a nih thu leh Sawrkar Laipui ruahmanna thar dang Goods and Services Tax (GST) pawh hman tan a nih tawh thu  khuallian chuan a tarlang a. District Industries Centre, District Marketing Office, Labour, Employment & Industrial Training, Co-operative Societies, Land Resources, Soil & Water Conservation, District Fisheries Development Office, District Animal Husbandry & Veterinary Office leh Department of Environment, Forest & Climate Change te hmasawnna hnathawh hrang hrang khuallian hian a tarlang bawk.

Thu a sawi zawh hian Khuallian chuan lawmman hrang hrang a sem nghal a. Republic Day parade-a unarmed contingent-ah Air Wing, BHSS Serkawn chu pakhatna niin, pahnihna Scouts and Guides Sacred Heart School leh pathumna Guides Company Mount Hermon School te an ni a. School contingent-ah Govt Higher Secondary School chu pakhatna niin, pahnihna Zakhuma Memorial Theiriat leh pathumna Christian Education Centre Chanmari te an ni. He'ng bakah hian parade endiktu (judge)-te, parade commander-te, armed contingent te, Pipe Band te leh parde contingent dang zawng hnenah lawmman pek a ni bawk.

Republic Day vawi 69-na puala buatsaih Volleyball Tournament mipaah Electric Veng chu pakhatna niin hmeichhiaah Electric Veng vek Champion an ni a.

Repubic Day Table Tennis Tournament Cadet Boys Champion C. Vanlalrempuia, Electric Veng, Junior Boys Champion F Malsawmtluanga Bazar Veng, Sub Junior Boys Champion Jona Lalhruaizela, Ramthar, Womens Champion C. Lalrinpuii College Veng, Mens 40+ Champion PC Vanlalkima Mizoram Police leh Open Singles Champion F. Malsawmtluanga Bazar Veng hnenah khuallian hian lawmman a sem a.

Tennis Tournament Under 14 Girls champion Lalrinsiami Sailo Chanmari, Under 14 Boys Champion Benjamin Zorinsanga Venglai leh Ladies Single Champion Sandhya Chhetri Electric Veng hnenah lawmman pek an ni bawk.

Lunglei District Republic Day 2018 lawmna pual hian Pu Darthawma, Freedom Fighter, District Jail, Bethel Centre, KK Home, TNT Kalvari Centre, MHIP Onyx Special School, WADA Center leh Remand Home-ah te Rs. 1500/- theuh thilpek hlan an ni. 

Thuamluaia Muala Republic Day lawmna hman zawh hian Lunglei DC Bungalow tualah VIP At Home Dinner Party hlimawm tak hman chhunzawm a ni.

Vawiin Lungleia Republic Day lawmnaah hian District officials, NGO hotute, khawtlang hruaitute,  thu thar theh darhtu te, sikul naupang leh mipui thahnem tak an tel.