Vawiin January 14 hi State Farmers’ Day, Kut Hnathawktute Ni a ni a. NLUP Implementing Board buatsaihin Aizawl Tourist Lodge ah NLUP hnuaia thawktu hrang hrang ten inhlan tharna hun an hmang a. Agriculture Minister Pu R. Lalzirliana chu Khuallian a ni.

Inhlan tharna inkhawm hi NIB Chairman Pu J.H.Rothuama’n a kaihruai a. Rev.C.Chanchinmawia, NLUP Apex Board member in hunserh a hmang a. Khuallian Pu .Lalzirliana chuan thawktute fuihna thu sawiin sorkar official te chuan an nihna chu hlawh lak nan chauh an ngai tur a ni lo va, ram leh hnam tan a thawk anni tih inhre reng chunga an thiamna leh theihna an hman a pawimawh a ni, a ti a. Pu Lal Thanhawla kaihhruai Mizoram sorkar chuan kut hnathawktute a ngaih pawimawh zia tilangin January 14 chu an mahni pual bika hman tur ni atan a lo puang a. Mirethei te dawmkang tura he sorkar in hma a lakna hi a taka ti hlawhtlingtu tur chu sorkar official te an ni a, official te hna thawh that leh that loh azirin sorkar tha leh tha lo kan nei a ni, a ti.

NLUP chungchang sawiin Pu Lalzirliana chuan sorkar term kal ta kum 3 vel emaw chauh la kalpui a nih avangin hlawhtlinna a la lang tak tak rih lo va. Tun hi a taka hma lak chhoh hun chu a ni, a ti a. NLUP enkawltu te leh mipui pawhin ngai ah kan neih mai ang tih a hlauhthawn thu a tarlang a. Kum 3 chhunga hmalakna ah a thalo lai awm te paih ngam a, kalphung thlak ngaite thlak a hma thar la turin thawktute chu a chah a. Hmasawnna hna thawktu te inkarah inpawhna leh thawhhona tha neih a tul tak meuh a ni, tiin Mizoram budget pangngai piah lama central sorkar sum hai chhuak turin sorkar official ten nasa lehzuala tan an lak a pawimawh hle a ni, a ti bawk.

Vawiina inhlan tharna inkhawmah hian Pi L.Tochhong, Chief Secretary pawhin sorkar official te fuihna thu sawiin sorkar term thar ah NLUP chu flagship programme a nih chhunzawm zel avangin a hlawhtlinna tura theihtawp chhuah turin thawktute a chah a. Chief Minister in a ngaih pawimawh em em inrenchem leh rinawm taka mahni hna thawh chu ngai pawimawh a zawm turin sorkar department zawng zawng te a chah a ni. Thusawitu dang Pu Joseph H.Thanzuala President, AMFU General Hqrs. chuan kuthnathwktuten ngaih pawimawh an hlawh avangin sorkar chungah lawmthu a sawi a.NLUP hlawhtlinna turin district hrang hranga AMFU office te leh AMFU branch hrang hrang te chu a tul anga official te tawiawm turin an inpeih reng tih a tarlang a ni. Inhlan tharna inkhawm hi Pu Zorammuana, Secretary, NIB in lawmthu sawiin a khar a ni.