Vawiin khan Parliamentary Secretary Pu Joseph Lalhimpuia chuan Mizoram pum a Govt. High School Headmaster-te tan a in-service training, Archive Hall, Babutlang a neih chu a hawng. He training hi State Project Office, RMSA buatsaih niin kumtin neih thin a ni.

Pu Joseph Lalhimpuia chuan Headmaster-te chu Zoram hmasawnna khalhtu pawimawh tak an ni tiin, an tan training buatsaih a ni chu lawmawm a tih thu a sawi a. Mizoram hi ram hmasawn leh intodelh a siam turin tui, industry leh ram leilung hausakna haichhuah kawngah te hmalakna kalpui mek a ni a. Chutihrual chuan hmasawnna kungpui, chhawr theih a inpeih reng kan neih sa chu mihring thiamna leh theihna - human resource hi a ni, Parliamentary Secretary chuan a ti a. He kan human resource neih hi hman tangkai a nih theih nan zirtirtuten mawh an phur lian hle a ni a ti bawk.

Headmaster-te chu ‘team captain’ ang hial an nih avangin school hmingthatna leh vanduaina ah pawh hotu chan changin mawhphurhna phur thiam zel turin leh, zirtirtu dang leh naupang te tana entawntlak a awm turin Pu Joseph Lalhimpuia chuan High School Headmaster kalkhawmte chu a chah a. Naupangten zirtirna tha an neih theih nan Sorkarin theihtawp chhuah a tum thu tarlangin, hemi kawngah hian zirtirtute lakah pawh beisei a nei ve dawn a ni tiin, thawhhona tha tak an neih a pawimawhzia a sawi bawk a ni.

Vawiin training hawnna inkhawm hi Pu C. Chawngthantluanga, Dy. State Project Director (A), RMSA in a kaihruai a, Pu V.L. Malsawma, Dy. State Project Director (P), RMSA in lawmthu sawiin hun hi a khar a ni. Govt. High School Headmaster-te training hian ni li (14-17 January) a awh ang a. Karleh January ni 21 atanga 24 hian Ad-hoc Aided High School leh RMSA Secondary School Headmaster-te tan training thawh hnihna neih a ni dawn a ni.