Nimin khan Lawngtlai District Election Officer Pu J. Hmingthanmawia, MCS chuan kan hma lawka Lai Autonomous District Council huam chhunga Village Council inthlan lo awm tura hman tur Draft Electoral Roll a tlangzarh.

Tun a LADC a Village Council dinglai hi thla thar February thla hian a tawp tawh dawn avangin kum tir atang khan VC thar thlanna tura inbuatsaihna kalpui a ni tawh a, nimin khan VC inthlanna atan a hman tur Electoral Roll thar siamna tura behchhan tur Draft Electoral Roll chu District Election Officer, Lawngtlai DC Pu J.Hmingthanmawia'n Lawngtlai DC Conference Hall ah a tlangzarh a, a copy te Political Party hrang hrang hnenah sem chhuah nghal a ni bawk. Draft Electoral Roll hi District Council in dan a neih angin MDC inthlan hnuhnungber kum 2010 a MDC Electoral Roll kha hman a ni a, Final Roll chu February 3,2014 ah tar chhuah theih beisei a ni.

Tlangzarh hnu hian  AERO tur a ruat mi 12 ten DC hovin Electoral Roll thar siam chungchang ah Training an nei zui nghal. Hetihlai hian Enumerator tura ruat ten Lawngtlai Press Club ah Election Officer Pu VL Remliana hovin Training an nei ve nghal bawk. Tun dinhmun ah LADC huamchhung ah Village Council 87 a awm mek a, LADC sawrkarin VC thar paruk siambelh remtih a ni tawh chu tun thlengin Governor in a la pawmpui lo ni a hriat a ni. Heng VC paruk siambelhte hi pawmpui a nih chuan LADC ah VC  93 ah inthlanna neih tur a ni dawn a ni.