Nimin khan Chief Minister Pu Lal Thanhawla chuan Hrangturzo Assembly Bial chhunga khaw hrang hrang – Bawktlang, Mualcheng, Biate, Leng, Sailulak leh East Lungdar te a tlawh a, heng khua ah te hian amah lo lawmin vantlang inkhawm an neihpui a, vawiin hian Sialsir a tlawh leh ang.

Heng khaw hrang hranga vantlang inkhawm neihah te hian Chief Minister Pu Lal Thanhawla chuan tun tum a zinna programme hi Inthlan hnua Sawrkar thar hnuaia Zokhaw lam a tlawhna programme hmasaber anih thu sawiin Hrangturzo bial mipuiin amah ropui leh hneh taka an thlan tling avangin a chhungte leh party aiawhin mipui te lawmthu a hrilh. Chutih rual chuan bial pahniha a tlin kawp vangin Dan in a phut angin bial pakhat zawk chu a chhuahsan a ngai dawn a ti a, party in uluk taka ngaihtuahna an sen hnuin Hrangturzo chu chhuahsan zawk se tiin ruahmanna an siam ta a ni, a ti. Chief Minister chuan Hrangturzo bial chu hreh tih takin a chhuahsan a tul thu sawiin a rilru, a ngaihtuahna leh a duhsakna te chuan he bial hi a chhuahsan dawn lo a ni, a ti. Party remruatna chu party mi leh sa, party inthununna hnuai awm leh party thu awih mi anih angin party remruatna chu a pawm a ngai a ni, a ti bawk.

Bawktlang ah chuan Chief Minister Pu Lal Thanhawla chuan hnam intodelh chu hnam changkang leh hnam zahawm an nih thin thu sawiin ei leh bar, sum leh pai lama intodelh nan Sawrkar chuan hma a la zel a, he intodelh nana hmalaknate hi Sawrkar emaw, Kohhran emaw, tlawmngai pawl emaw mawh a ni lova, kan zavai mawhphurna theuh a ni a, neitu rilru pua he mawhphurna hi kan zavaia kan hlenchhuah a tul a ni, a ti. Sawrkar a innghat leh a tihsak ringawt nghak loa, intodelhna rilru pu a theihna apianga mahni a hma lak chu changkanna a ni, a ti bawk.

Mualcheng ah chuan Chief Minister Pu Lal Thanhawla chuan politics inlumlet hian mihring nun a nghawng na bik, chumi boruak chuan mihringte chu inangkhatin a hrut vek a ni, a ti. Rambuai chungchang sawiin Chief Minister chuan rambuai chhung khan mipui an rethei a, an eizawnna kawng tinreng a nghawng nasa a, khawtlang nun leh kohhran nunte a tla hniam a, chu chuan thlarau nun thleng khan a nghawng a ni, a ti. Pathianin min hunna apiang chu a rawngbawl turah min dah a nih tih hre rengin kan hna theuh tui takin rinawmna, dikna, taimakna leh Pathian thihna nung nen kan thawh chuan mite tan malsawmna kan ni thei anga, tichuan ram leh hnam zahawm kan ni thei dawn a ni, a ti Chief Minister chuan a ti.

Biate ah chuan Pu Lal Thanhawla chuan rail kawng chu Mizoram hmar atanga Mizoram chhim thleng kal tlang tir tum anih thusawiin hei hian ram thenawm Bangladesh, Myanmar leh Asia Chhimchak bial te nen insumdawn tawnna zau zawk a hawng thei dawn a, chu chuan sum leh pai lamah intodelhna a thlen thei dawn a ni, a ti. Heng insumdawn tawnna remchang hian Chanchin Tha hril na tur leh Mission Field zauhna kawng tha tak a hawng dawn a ni, a ti bawk.

East Lungdar ah Chief Minister chuan NLUP chungchang sawiin NLUP chu Pathian lam tang programme a ni a, amah rawn chhunga ruahman anih vangin NLUP kaltlang hian Pathianin Mizoram chu a malsawm ngei ka ring tlat a ni, a ti. NLUP hlawhtlinna chuan miretheite a kaichhuah mai bakah ei leh bar lamah intodelhna a thlen theih thu a sawi bawk. Mirethei leh mi harsa te chu kan theihna apiangin kan tanpui tur a ni a, mahse mite hlawhtlinna emaw, mite thawhsa emaw atanga thil tha tih tum chu a ropui lo a, mite denchena pawl din hi a Kristian loin, Ringtu tih a pawh a mawi lo a ni, a ti.

Khaw hrang hrang vantlang inkhawm ah te hian Horticulture Minister Pu PC Lalthanliana, Health Minister Pu Lal Thanzara, Law Commission Chairman Pu John Siamkunga leh NLUP Implementing Board Vice Chairman, Pu P L Thanga te pawhin thu an sawi a ni.

Chief Minister hi a nupui Pi Lal Riliani, Horticulture Minister Pu P.C. Lalthanliana, Health Minister Pu Lal Thanzara, Mizoram Law Commission Chairman leh South Tuipui bialtu MLA ni bawk Pu John Siamkunga leh Pu P. L. Thanga, Member Secretary, State Planning Board leh Vice Chairman, NLUP Implementing Board ni bawk ten an tawiawm. PHE leh P &E Secretary leh Engineer-in-Chief PWD ni bawk Pu Lianchungnunga, PHE Department E-in-C Pu Lalfanliana, Agriculture Department Director Dr. Lalzarliana, Horticulture Department Director Pu R Zotawna, Health Services Department Director Dr. K. Ropari, Rural Development Director Pu V Lalsangliana leh senior officers dang engemaw zat in an tawiawm bawk a ni.

Attachment

  • Loading attachment...