Nimin khan FCS&CA Minister Pu John Rotluangliana chuan Parliamentary Secretary Pu T.T. Zothansanga, KVI Board Chairman Pu K. Lianzuala, FCS&CA Director Pu R. Lalvena leh Officer thenkhat hovin Zuangtui Supply Godown leh Tanhril FCI Godown a tlawh a. Kudam a buhfai, chini leh wheat dinhmun bakah Tanhril kudam panna kawng siam mek dinhmunte enfiah a ni.

FCI kudam panna kawng (approach road) leh turning point siam hna chu tluang taka kalpui mek a ni a. Minister chuan uluk leh chak taka thawk turin contractor-te chu a fuih a ni. Tanhril kudamah hian tun dinhmunah buhfai quintal 43,000 leh wheat quintal 1,1000 a awm a. Kudamin a dawn theih chin (capacity) hi quintal 10,000 in a pel a ni. Heng bakah hian kawng laka truck thang mek, chawh ruala quintal 20,000 vel phur an awm bawk.

Zuangtui supply kudamah hian tun dinhmunah buhfai quintal 23,277.91 a awm a, hei hian Aizawl leh a chhehvel thla khat aia tam a chawm theih rin a ni. Chini quintal 6,600 awm bawkin, tun thla tawpa semchhuah theih tur a buatsaih a ni.

Kudam a buhfai, chini leh wheat stock awmte hi thingtlanga phurhchhuah zel thin a ni a. Heng bakah hian fur laia thingtlang kilkhawr zuala buhfai harsatna awm thin sutkian nan a Supply Department-in buhfai a chhek khawl thin -‘monsoon stocking’ chu tun atang hian ngawrh taka hmalakna kalpui mek a ni. LPG leh POL dinhmun pawh Department hotute chuan a tha thawkhat hle in an sawi a ni.